28 aqpanda Almaty qalasynda Mountain Ski Resort Oi-Qaragai Lesnaya Skazka kýrortynda fristaildan FIS álem kýbogynyń kezeńderi bastalady, dep habarlaidy "Ult aqparat".
Búgin uiymdastyrýshylar Almatyda baspasóz máslihatyn ótkizdi. Olar dúbirli dodaǵa qalai daiyndalyp jatqany týraly aitty. Dúnieniń ár túkpirinen kil myqty sportshylardyń basyn biriktiretin jarysqa álemde taralyp jatqan koronavirýs qalai áser etetindigin túsindirdi.
Fristaildyń mogýl jáne shańǵy akrobatikasy túrlerinen saiysqa 17 elden sportshylar keledi. Kórermender Eýropa, Aziia, AQSh, Kanada, Resei arnalary arqyly tikelei tamashalai alady.
QR Shańǵy sporty qaýymdastyǵynyń bas hatshysy Asqar Ýálievtiń aitýynsha, koronavirýsqa bailanysty sheteldik sportshylardyń Qazaqstanǵa kirýine qatysty azdaǵan kedergiler bolǵanymen, qazir qaýiptenetin sebep joq.
«Shańǵy akrobatikasyna qatysatyn Minsk, Kiev, Ystanbul qalalarynan kelgen sportshylar sońǵy 2 aida Qytai aýmaǵynda bolmaǵan. Biz olardyń tólqujattaryn aldyn ala tekserdik. Barlyq komanda aman-esen keldi. Áýejaida QR DSM talaptaryna sai tekserýden ótti. Qazir olardyń barlyǵy qonaq úilerge ornalasty. Daiyndyqty bastap ketti», - dedi Asqar Ýáliev.
Halyqaralyq shańǵy sporty túrleri federatsiiasynyń (FIS) Fristaildan álem kýbogynyń direktory Djo Fittsjerald atalǵan indetke bailanysty Qytaidan shekteýli komanda kelgenin aitty. Onyń ishinde Qytai territoriiasynda sońǵy 2 aida bolmaǵan tek mogýl sporty ókilderi ǵana kelgen.
Shańǵy akrobatikasy boiynsha Qytai komandasy saiysqa qatyspaidy.
«Qytaida ulttyq saiys bolmaityn bolǵan soń Qytai komandasy Belarýs eliniń Minsk qalasynda jattyǵyp jatyr. Olar Krasnoiarsk qalasynda eki aptadan soń ótetin Álem kýbogynyń aqtyq synynda shyǵatyn bolady», - dedi Djo Fittsjerald.
Uiymdastyrýshylardyń aitýynsha, qys jyly bolǵanmen Almatyda shańǵy joldary saiysqa daiyn.
Bul saiystarda Qazaqstannyń namysyn Olimpiada oiyndarynyń qola júldegerleri men Álem kýbogy kezeńderiniń jeńimpazdary Iýliia Galysheva, Dmitrii Reiherd, Pavel Kolmakov, Aiaýlym Ámirenova, Sergei Romanov, Janbota Aldabergenova, Aqmarjan Qalmyrzaeva qorǵaityn bolady.
Fristaildan Álem kýbogynyń kezeńderi 1980 jyldan beri jyl saiyn ótip keledi.
