Almatyda Táýelsizdiktiń 30 jyldyǵyna orai 9 tarihi telehikaianyń tanystyrylymy ótti, dep habarlaidy QazAqparat tilshisi.
Táýelsizdik merekesi qarsańynda «Qazaqstan» telearnasynan ult qairatkerleri Ahmet Baitursynuly, Jumabek Táshenev, Qanysh Sátbaev, Muqaǵali Maqataev, Jáńgir han men Domalaq ananyń ómirine arnalǵan 6 tarihi týyndy kórsetile bastady. Al aty ańyzǵa ainalǵan KSRO Halyq ártisi jáne Halyq qaharmany Roza Baǵlanova týraly «Bulbul» telehikaiasyn kórermender «Habar» arnasynyń efirinen kóre alady. Sondai-aq, «Almaty TV» telearnasy elim-jerim dep ótken Turar Rysqulovtyń ómir jolyn baiandaityn «Qyzyl jebe» teleserialyn túsirse, «31 telearna» uly aqyn Jambyl Jabaev pen jas reper Jambonyń taǵdyryna arnalǵan «Júrek jyry» teleserialyn kórermenge usynyp otyr.
Sharaǵa QR Memlekettik hatshysy Qyrymbek Kósherbaev, QR Premer-Ministriniń orynbasary Eraly Toǵjanov, Aqparat jáne qoǵamdyq damý ministri Aida Balaeva, mediamenedjerler, ziialy qaýym ókilderi men jýrnalister qatysty.
«Kino – urpaq sanasyn qalyptastyratyn ideologiialyq qural. Jahandaný dáýirinde ómir súrip, álemdik mádeniettiń myń san boiaýy bir arnada aralasyp ketken zamanda esik-terezemizdi qymtap, órkenietten bólektenip ómir súre almasymyz anyq. Osy rette ulttyq ideologiiamyzdy nasihattaýda, urpaqqa ulaǵatty tárbie berýde, ulttyq sipatymyzdy tanytýda kino óneriniń alar orny erekshe. Sondyqtan Memleket basshysy Qasym-Jomart Kemeluly Toqaev «Táýelsizdik bárinen qymbat!» atty maqalasynda atalǵan salaǵa airyqsha basymdyq berdi. Prezident maqalasynda «Men quzyrly organdar men otandyq telearnalarǵa memlekettik tapsyrystyń belgili bir bóligin mindetti túrde tarihi taqyryptarǵa baǵyttaýdy tapsyramyn» degen bolatyn» - dedi QR Memlekettik hatshysy Qyrymbek Kósherbaev.
Osy sharaǵa orai uiymdastyrylǵan dóńgelek ústel barysynda qatysýshylar otandyq serial naryǵynyń búgini men erteńi jaily sóz qozǵap, ózekti máleselerdi talqylady. QR Aqparat jáne qoǵamdyq damý ministri Aida Balaeva qazaqstandyq teleserialdardy túsirý baǵytynda anyqtalǵan problemalardy atap ótip, onyń sheshý joldaryn usyndy.
«Birinshiden, otandyq teleserialdar túsirý jobasyna Mádeniet jáne sport ministrligi janynan qurylǵan Ulttyq kinony qoldaý memlekettik ortalyǵynyń áleýetin paidalaný. Bul qarjy jetispeýshiligine bailanysty máseleni sheshýge birden bir septigin tigizer edi. Ekinshiden, memlekettik aqparat tapsyrysy sheńberinde bólinetin qarjyny úsh jyldyq biýdjet formatyna aýystyrý. Bul tarihi týyndylardy túsirýge jetkilikti ýaqyt berip, túsirilim barysynda týyndaǵan máselelerdi sapaly sheshýge oń yqpal eter edi. Taǵy bir atap ótetin másele, tarihi týyndylar túsirýge qajetti rekvizitterdiń jetispeýshiligi jii oryn alady. Bul rette, «Qazaqfilmniń» balansyndaǵy kostiýmder men dekoratsiialardy jeńildikpen nemese tegin paidalaný múmkindigi qarastyrylsa. Búginde olardy serialdarǵa qoldaný úshin qomaqty tólemaqy talap etiledi. Bul de óz kezeginde bólingen qarjyǵa aitarlyqtai salmaq salady» - dedi ministr óz sózinde.
