Foto: Tengrinews.kz
Almatyda órtengen hostel qurylys talaptary men órt qaýipsizdigi erejelerin buza otyryp salynǵan, dep habarlaidy "Ult aqparat" qala ákimdiginiń baspasóz qyzmetine silteme jasap.
"Ǵimarattyń iesi - «KÝSA Halyk» JShS. Jalǵa alýshy – «ALA Hostel» JShS, jaldaý jónindegi kelisim shart biyl 21 qyrkúiekte jasalǵan. Jer ýchaskesiniń nysanaly maqsaty: dúkendi paidalaný jáne qyzmet kórsetý.
Bul nysan bir jarym ai buryn hostelge ainaldy. Hostel alańy 457 sharshy metrdi quraidy.
Aita keterligi, «QR-daǵy sáýlet, qala qurylysy jáne qurylys qyzmeti týraly» QR Zańyna sáikes, úi-jailardy qaita jabdyqtaý kezinde ruqsat qujattaryn alý kerek. Onyń ústine Almaty qalalyq josparlaý jáne ýrbanistika basqarmasy qaita jabdyqtaýǵa arnalǵan bastapqy ruqsat qujattaryn (APZ, sheshim) bermegen. Dúkennen hostelge fýnktsionaldyq maqsaty ózgergen kezde sanitarlyq-epidemiologiialyq, qurylys talaptary men órt qaýipsizdigi erejelerin oryndaýy qajet.
Sanitarlyq-epidemiologiialyq talaptardyń 23-tarmaǵyna sáikes, hosteldi jertóle jáne jertóle qabattarynda ornalastyrýǵa tyiym salynady. Osylaisha, hostel joǵaryda atalǵan mekenjai boiynsha sanitarlyq-epidemiologiialyq, qurylys talaptary men órt qaýipsizdigi erejelerin buza otyryp, zańsyz ornalasqan" - delingen habarlamada.
Eske sala keteiik, 30 qarashada tańerteń Almatyda Ádi Sháripov kóshesindegi hostelde órt shyǵyp, aldyn ala málimet boiynsha 13 adam qaza tapty.
