Almatyda politsiia qyzmetkerleri órtengen páterden jasóspirim qyzdy qutqardy, dep habarlaidy "Ult aqparat".
Qalalyq Politsiia departamentiniń habarlaýynsha, departamenttiń Arnaiy jedel áreket etý jasaǵynyń aǵa inspektory, politsiia maiory Baýyrjan Aiazbaev pen politsiia kapitany Serikjan Edrenov órt shyqqan turǵyn úidiń mańaiyn jaiaý qaraýyldap júrgende shuǵyl habardy estigen.
Oqiǵa ornyna dereý jetken kezde kópqabatty turǵyn úidiń úshinshi qabatyndaǵy páterden qoiý tútin shyǵyp jatqan. Dálizde páterdiń esigin asha almai jatqan erli-zaiyptylar ishte qyzynyń qalyp qoiǵanyn aitqan.
«Kórshiler jedel qyzmet ókilderin shaqyrǵansha áreket etý qajet edi. Politsiia qyzmetkerleri esikti baltamen syndyrýǵa májbúr bolǵan. Úige kirip, uiyqtap jatqan qyzdy alyp shyǵyp, meditsina qyzmetkerleriniń qolyna tapsyrǵan. Inspektorlar óz mindetterin tamasha atqardy» - dedi Politsiia departamentiniń Arnaiy jedel áreket etý jasaǵynyń komandiri Sergei Afanasenko.
Belgili bolǵandai, 13 jastaǵy qyz bala mektepten kelgen soń gaz plitasyna tamaqty jylytýǵa qoiǵan. Sodan soń jatyn bólmesine baryp, qulaqqap kiip uiyqtap ketken.
