Qazaq onkologiia jáne radiologiia ǵylymi-zertteý institýtynyń onkolog-neirohirýrgtary omyrtqadaǵy isikti alý boiynsha joǵary tehnologiialyq ota jasady, dep habarlaidy "Ult aqparat".
Qazaq onkologiia jáne radiologiia ǵylymi-zertteý institýtynyń habarlaýynsha, 41 jastaǵy naýqas onkologtarǵa arqasy qatty aýratynyn aityp shaǵymdanǵan. Buǵan deiin, ol Almatydaǵy túrli aýrýhanalarǵa júgingen, biraq oǵan operatsiiany tek QazOjRǴZI jaǵdaiynda ǵana júrgizýge bolatynyn aitqan.
«1980 jylǵy áieldiń 3-shi omyrtqasy isikpen zaqymdanyp, synyp, asqynǵan. Isik protsesi julynnyń tamyrlaryn qysyp tastaǵan, bul patsient júrgende qatty aýyrsynady, sol sebepti naýqas aqsap júrgen. Únemi aýyrsynýdy basatyn dári ishken. KT-da biz omyrtqanyń tolyq zardap shekkeninin kórdik. Isikti alyp tastaý jáne zaqymdalǵan omyrtqany arnaiy metall konstrýktsiia kómegimen qalpyna keltirý úshin hirýrgiialyq jolmen spondilodez jasaý týraly sheshim qabyldandy», – dedi QazOjRǴZI neiroonkologiia ortalyǵynyń neiroonkolog - hirýrgy Aidar Ysqaqov.
Dárigerdiń aitýynsha, spondilodez - bul arnaiy quraldardy qoldanatyn joǵary tehnologiialyq operatsiia. Hirýrgiia rentgen sáýlesiniń edáýir dozasyn qoldaný arqyly júzege asyrylady.
«Birinshi kezeńde omyrtqanyń qysylýyn joiý úshin transpedikýliarlyq bekitpe jasaldy. Sodan keiin omyrtqaǵa arnaiy burandylar ornatyldy, olardyń arasyna titan qurylymy bekitildi. Munyń bári rentgen baqylaýymen, portativti rentgen qondyrǵysynyń kómegimen júzege asyryldy. Operatsiia 3 saǵatqa sozyldy» ,- dedi QazOjRǴZI neiroonkologiia ortalyǵynyń meńgerýshisi Berik Isataev.
Qazirgi ýaqytta naýqastyń jaǵdaiy jaqsy. Dárgerler ony úiine shyǵarýǵa daiyndap jatyr.
«Atalǵan joǵary tehnologiialyq jáne qymbat turatyn spondilodez operatsiiasy bizdiń institýtta barlyq patsientter úshin qoljetimdi. Ol úshin emdeýge jatqyzý portaly arqyly joldama alý qajet»,- deidi bólim meńgerýshisi.
