Almatyda koronavirýstyń "omikron" shtamy anyqtalǵan joq. Bul týraly qalanyń bas sanitar dárigeri Jandarbek Bekshin málimdedi, dep habarlaidy Sputnik Qazaqstan.
"Qala 13 jeltoqsannan beri "jasyl" aimaqta tur. Apta saiyn aýrýshańdyq kórsetkishi tómendep jatyr. Jeltoqsanda boljam boiynsha 1200 jaǵdai tirkeledi, sebebi aidyń aiaqtalýyna bir apta qaldy. Al qala boiynsha táýligine 35-40 jaǵdai tirkelip jatyr", - dedi Bekshin.
Qalanyń bas sanitar dárigeri koronavirýstyń "omikron" shtamy kópshilikti alańdatyp otyrǵanyn aitty.
"Densaýlyq saqtaý ministrliginen zertteý nátijelerin aldyq. Qalamyzda "omikron" shtamy tabylǵan joq. Barlyq jaǵdaidy baqylap otyrmyz", - dedi Jandarbek Bekshin.
Aitýynsha, zertteý kezinde qalada "delta+" shtamy jii anyqtalǵan.
"Omikronnyń" aldyn alý sharalary barysynda shetelden keletin áýejai jolaýshylaryn baqylaýǵa alyp jatyrmyz. "Omikron" tirkelgen elderden qalamyzǵa 1 600 adam kelgen. Olardyń arasynda zertteý júrgizgen kezde alty adamnan koronavirýs qozdyrǵyshy anyqtaldy. Qazir alty synama Nur-Sultan qalasyna arnaiy zerthanaǵa jiberildi. Onyń jaýabyn 10 kúnnen keiin alamyz", - dedi qalanyń bas sanitar dárigeri.
Jandarbek Bekshin AQSh, Germaniia, Resei, Ulybritaniia, Izrailden keletin jolaýshylar alańdatyp otyrǵanyn aitty. Onyń sózinshe, koronavirýs qozdyrǵyshy anyqtalǵan alty jolaýshy Germaniia men Ulybritaniiadan kelgen.
Aita keteri, buǵan deiin Bekshin qalada "omikron" shtamynyń bar-joǵyn anyqtaý qalai júrip jatqanyn aitty.
"Qazir qala boiynsha "omikron" boiynsha baqylaý júrgizip jatyrmyz. 3 jeltoqsanda Nur-Sultan qalasyna 53 synama jiberdik. Onyń maqsaty – sol synamalarda "omikron" shtamynyń bar-joǵyn anyqtaý. Zertteý uzaq ýaqytqa sozylady", - dedi Bekshin 10 jeltoqsanda ótken brifingte.
