Foto: 24kz
Almatydaǵy bastaýysh synyp oqýshylaryna sabaq arasynda demalý múmkindigi jasaldy – mektepterde arnaiy "uiyqtaityn parta" ornatyldy. Bul týraly "Habar 24" habarlady.
Bul partalarda balalar úzilis kezinde 20 minýtqa deiin myzǵyp ala alady, bul olardyń damyp kele jatqan aǵzalary úshin óte paidaly. Zaman talabyna sai bolý maqsatynda mektepter jasandy intellektini de belsendi túrde qoldana bastady, bul ádis oqý úrdisin jeńildetip, qyzyqty ári mazmundy ótkizýge kómektesedi.
Keibir oqýshylardyń alystan kelip, erte turatynyna bailanysty, olar uiqysyn qandyrmaidy, joldaǵy keptelister de sharshatady. Bul faktorlar olardyń densaýlyǵyna keri áser etýi múmkin. Endi úzilis kezinde balalar partalaryn tósektei sozyp, demala alady. Mundai partalar Almatydaǵy №15 gimnaziianyń barlyq bastaýysh synyptaryna ornatyldy.
"Bul partalardyń ereksheligi – qońyraý kezinde balalarǵa 15-20 minýt relaksatsiia ýaqyty beredi. Biz onyń balalardyń densaýlyǵy men oqý úrdisine qalai áser etetinin tájiribe júzinde baqylap kóremiz", - deidi mektep muǵalimi Raýan Janathanova.
Almatydaǵy №15 gimnaziia jańashyl mektepter qatarynda. Biyl munda 20 kabinet jańartylyp, barlyq muǵalimder jasandy intellekti qoldaný boiynsha kýrstardan ótti.
"Shveitsariiada memorandýmǵa qol qoiǵan soń, ustazdarymyzdyń barlyǵy derlik bul kýrsty aiaqtady. Keibireýlerinde keremet jetistikter bar, al keibiri áli de úirený ústinde", - dep atap ótti mektep direktory Bulbul Ospanbek.
Mektepte sonymen qatar erekshe teatr, zamanaýi kitaphana, jáne psihologiialyq stýdiia jumys isteidi. Oqýshylar óz qoldarymen sahnalyq zattar men kiimder jasaidy, al tárbie saǵattarynda tsifrlyq quraldar qoldanylyp, oqytý tiimdiligi artyp keledi.
