Almatyda ókpesi 100% zaqymdanǵan áiel shuǵyl kómek kórsetý aýrýhanasynan emdelip, úiine shyqty, dep habarlaidy "Ult aqparat".
Almatylyq Maira Quspanovanyń aitýynsha, búgingi týǵan kúnin eshqashan umytpaidy. Ol óziniń týǵan kúninde Almaty qalalyq jedel shuǵyl kómek kórsetý aýrýhanasynan aman-esen shyqty. Munda ol bir ai koronavirýsten emdeldi.
Almaty qalalyq Qoǵamdyq densaýlyq saqtaý basqarmasynyń málimetinshe, naýqas aýrýhanaǵa 1 sáýir kúni ókpeniń 100 paiyz zaqymdanýymen aýyr halde túsken. Onyń ómirin saqtap qalý úshin dárigerler jansaqtaý bóliminde eki apta kúresti. Ol ókpeni jasandy jeldetý apparaty men Higt Flow-da bes kún, ókpeni invazivti emes jeldetý apparatynda úsh kún jatty.
«Men óz-ózime kele almai, tynys alý apparatynda jatyp, o dúnieni kórdim desem bolady. Aq halatty abzal jandarǵa myń alǵys. Atap aitar bolsam, Gúlnar Berdalina, Gúlmira Toibaeva, Janat Ábdimoldaeva, Baktiiar Bekishev, Aidan Nurlybek, barlyq medbikeler men sanitar qyzdarǵa ekinshi ómirdi syilaǵany úshin kóp raqmet. Koronavirýsqa áli de senbeitin adamdarǵa, vaktsina saldyrtyp, kútim jasaýdy usynamyn, densaýlyqqa artyq qaýip tóndirýdiń qajeti joq», - deidi Maira Quspanova.
Naýqastyń kúndelikti emdeý barysyn bas dáriger Almaz Djývashev bastaǵan aýrýhana meńgerýshileri baqylap otyrdy.
«Patsienttiń saýyǵýy túrli mamandyqtaǵy dárigerlerdiń ýaqtyly kómegi, komandalyq jumys pen naýqastyń óziniń emdelýge degen peiiliniń nátijesi. Jáne eń bastysy reanimatologtardyń arqasy»,- deidi dáriger Gúlmira Toibaeva.
Búgin aýrýhana qyzmetkerleri Maira Quspanovany týǵan kúnimen quttyqtap, úiine shyǵaryp saldy.
