Almaty ákiminiń orynbasary Erjan Babaqumarov onlain-bailanys rejiminde Ortalyq qalalyq klinikalyq aýrýhana ujymymen jinalys ótkizdi, dep habarlaidy "Ult aqparat".
Otyrysqa Qoǵamdyq densaýlyq saqtaý basqarmasynyń basshysy Tileýhan Ábildaev, aýrýhananyń bólim meńgerýshileri men direktordyń orynbasary qatysty.
Jiynda jumysqa ornalastyrý jáne koronavirýsqa qarsy kúreske jumyldyrylǵan, infektsiiany juqtyrǵan meditsina qyzmetkerlerine ústemeaqy tóleýdi júzege asyrý boiynsha eńbek ujymynyń máseleleri qaraldy. Sonymen qatar, Ortalyq qalalyq klinikalyq aýrýhana bas dárigeriniń mindetin ýaqytsha atqarýshy Gúlnar Qulqaevanyń baiandamasy tyńdaldy.
Gúlnár Qulqaevanyń aitýynsha, aýrýhananyń 10 qyzmetkeri óz erkimen jumystan shyqqan. 1 maýsymǵa deiin saýyqqan 143 qyzmetker jumysqa ornalasady, al 1-15 maýsym aralyǵynda qalǵan barlyq qyzmetkerler jumysqa shyǵýǵa daiyn.
Otyrysqa qatysýshylar qalalyq karantin rejiminiń aiasynda qalyptasqan eńbek quqyǵyn odan ary retteý sharalary boiynsha Qoǵamdyq densaýlyq saqtaý basqarmasynyń tásilderin qarastyrdy.
Ortalyq qalalyq klinikalyq aýrýhana qyzmetkerleri úshin aǵymdaǵy jyldyń 1 maýsymynan bastap 15 kúnnen vahtalyq jumys ádisi belgilengen, alaida bul ádis jansaqtaý bólimindegi mamandarǵa qatysty emes, olar úshin saǵattyq jumys kestesi qarastyrylǵan.
Sonymen birge, OQKA qyzmetkerlerin barynsha №4, №7 aýrýhana men qalalyq jedel shuǵyl kómek kórsetý aýrýhanasynadaǵy bos oryndarǵa jumysqa ornalastyrý tapsyryldy.
Sondai-aq, jumysqa ornalastyrylmaǵan OQKA qyzmetkerlerine óndiristiń toqtap turǵan kezeńinde jergilikti biýdjet qarjysy esebinen ortasha ailyq eseppen jalaqy tóleý josparlanyp otyr.
Ústemaqy máselesi boiynsha arnaiy jumys toby quryldy, tizimder jasaldy, jaqyn arada densaýlyq saqtaý ministrliginiń arnaiy toby júrgizgen tergeý amaldarynyń resmi nátijesi kútilýde. Soǵan bailanysty sońǵy sheshim qabyldanady.
