Almaty qalalyq ákimdiginde qalada nan baǵasynyń ósýi jaily sóz boldy, dep habarlaidy QazAqparat.
Almaty qalasynyń kásipkerlik jáne investitsiialar basqarmasynyń málimetinshe, qalada jeltoqsan aiyna deiin nan baǵasynyń ósýi boljanbaidy. Qazirgi tańda Almatyda bir bólke nannyń (formalyq) baǵasy 75-90 teńge turady. Bul — elimizdegi eń tómen baǵalardyń biri.
«Bul kórsetkishke áleýmettik mańyzy bar azyq-túlik taýarlarynyń baǵasyn turaqtandyrý úshin istelip jatqan sharalar arqyly qol jetkizildi. «Aqsai» nan-toqash kombinaty» JShS-ǵa belgilengen shekti satý baǵasy bir bólke úshin 75 teńge deńgeiinde áleýmettik nan (formalyq, 1-shi surypty unnan) óndirý úshin jeńildikpen 1 mlrd teńge somasynda qaryz berildi», - dep habarlady basqarmadan.
Sondai-aq, ákimdikte nannyń tómen baǵasy qalai qamtamasyz etiletini aityldy.
«Nannyń tómen baǵasyn qamtamasyz etý «Aqsai» nan-toqash kombinaty» JShS-men jeńildetilgen qaryz týraly shart jasasýǵa bailanysty, sondai-aq, barlyq saýda jelilerin, 3000-nan astam dúkender men distribiýtorlardyń kómegimen ishinara azyq-túlik bazarlaryn «Aqsai» ónimderimen qamtý esebinen júrgizilýde. Uqsas jaǵdai, «Toimart» saýda jelisimen sóredegi bir bólke úshin bekitilgen 75 teńge baǵasymen 940 tonna nandy satý týraly kelisim shart jasaldy», - dep tolyqtyrdy ákimdik.
