Almatyda jappai tártipsizdikter kezinde biznes nysandary arasynda qyzmeti azyq-túlik satýmen bailanysty emes dúkender eń kóp zardap shekken. Bul týraly Almaty qalasy ákiminiń orynbasary Iliias Óserov málim etti, dep habarlaidy QazAqparat.
Búgingi kúni Almatyda qala ákiminiń tapsyrmasy boiynsha zalaldy baǵalaý jónindegi qalalyq jáne aýdandyq komissiialar qurylyp, jumys isteýde. Komissiia jumysyna barlyq qyzmetter men uiymdar, onyń ishinde «Atameken», táýelsiz baǵalaýshylar men aýditorlar palatasynyń ókilderi kirgen.
14 qańtardaǵy málimetke sáikes, Almatyda múliktiń barlyq túri boiynsha zalaldyń jalpy somasy 112 mlrd teńgeden astamdy qurady. Onyń ishinde biznes sýbektileri boiynsha – 67 mlrd teńge.
Iliias Óserovtyń aitýynsha, qalada azyq-túlik emes dúkenderine – 20,9 mlrd, azyq-túlik dúkenderine – 5,7 mlrd, qarý-jaraq dúkenderine – 6,4 mlrd, lombardtarǵa – 2,9 mlrd, qoǵamdyq tamaqtaný obektilerine 1,8 mlrd teńgege zaqym kelgen.
«Qarjy uiymdary boiynsha (bank bólimsheleri, bankomattar) aldyn ala derekke sáikes, zalal 701,7 mln teńgeni qurady. Qarjy naryǵyn retteý jáne damytý agenttigi ekinshi deńgeili banktermen birlesip, zaqym kelgen nysandar boiynsha derekter jinaýda. Jaqyn kúnderi agenttikten málimetter alamyz dep kútýdemiz», - dedi ol.
Iri biznes boiynsha shyǵyn shamamen 25 mlrd teńgeni qurady. Budan basqa, janar-jaǵarmai quiý beketterine 306 mln teńge kóleminde zaqym kelgen. Basqa nysandar boiynsha 3,1 mlrd teńgeni qurady.
«20 ákimshilik ǵimarat, politsiia departamentiniń 10 beketi, 17 ekopost jáne áýejai ǵimaraty boiynsha shyǵyn 22,6 mlrd teńgeden asady», - dep atap ótti Iliias Óserov.
Sonymen qatar ákimdik ǵimaratyna – 20 mlrd, QR Bas prokýratýranyń arnaiy esepke alý basqarmasynyń ǵimaratyna – 2 mlrd, Politsiia departamenti men aýdandyq basqarmalardyń ǵimarattary men beketterine - 205 mln,17 ekopostqa – 162,7 mln, meditsinalyq nysandarǵa 2,1 mln teńgege zaqym kelgen.
