Foto: Gov.kz
Almatyda Narhoz ýniversitetinde ITMLab jobasynyń ekinshi maýsymyna arnalǵan Intro Day is-sharasy ótti, dep habarlaidy Ult.kz.
Onda elimizdiń ár óńirinen kelgen 40 komanda múgedektigi bar adamdardyń ómir sapasyn jaqsartýǵa baǵyttalǵan zamanaýi tehnologiialyq sheshimderin usyndy. Sharany ITeachMe qory QR Eńbek jáne halyqty áleýmettik qorǵaý ministrligi men Chevron kompaniiasynyń qoldaýymen uiymdastyrdy.
Bul joly qatysýshylardyń geografiiasy keńeiip, Almaty, Astana, Shymkent, Taraz, Aqtaý, Pavlodar, Aqtóbe, Taldyqorǵan jáne basqa da qalalardy qamtydy. Bul joba ulttyq deńgeide inkliýzivti ortany damytýǵa erekshe úles qosyp otyrǵanyn kórsetedi.
Komandalar inkliýziiany arttyrýǵa baǵyttalǵan birqatar tyń jobalaryn tanystyrdy. Olardyń ishinde:
-
aiaqqa arnalǵan ekzoskelet prototipi;
-
sal aýrýyna shaldyqqan adamdarǵa arnalǵan jasandy intellekt negizindegi aýyzishilik kapa;
-
kórý qabileti tómen jandarǵa keńistikte baǵdarlaýǵa kómektesetin smart-kózildirik;
-
ym-ishara tilin naqty ýaqytta aýyzsha sózge aýdaratyn HandInHand atty JI platformasy bar.
Is-sharada QR Eńbek jáne halyqty áleýmettik qorǵaý vitse-ministri Viktoriia Shegai quttyqtaý sóz sóilep, mundai bastamalardyń mańyzdylyǵyn atap ótti. Onyń aitýynsha, jastardyń kreativti oiy men batyldyǵy jańa múmkindikter ashyp, shynaiy inkliýzivti qoǵam qalyptastyrýǵa jol ashady.
Vitse-ministr ótken jylǵy jobalardyń naqty nátijelerine de toqtaldy. Máselen, finalǵa shyqqan 6 komanda kórý qabileti nashar adamdarǵa arnalǵan sensorly alqa, ońaltý ekzoskeleti jáne ym-ishara tilin aýdaratyn qosymsha siiaqty erekshe sheshimderin usynǵan bolatyn.
Biyl da úzdik 20 komanda iriktelip, kelesi treking kezeńinde óz jobalaryn odan ári damytady.
Aita keteiik, ITMLab jobasy qatarynan ekinshi jyl ótkizilip otyr. Ótken maýsym qorytyndysynda úzdik startaptar grant ielenip, ózderiniń prototipterin iske asyrýǵa múmkindik alǵan. Joba inkliýzivti qoǵamdy damytýǵa baǵyttalǵan ulttyq platformaǵa ainalyp keledi.
