Almatyda Turan ýniversitetiniń múmkindigi shekteýli stýdenti Samat Ramazanovty jataqhanadaǵy kórshisi soqqyǵa jyqqan, – dep habarlady «Help Today» qorynyń jetekshisi Elmira Álieva Facebook paraqshasynda.
«Bizdiń qorymyzdyń qyzmetkeri, stýdent Samat Ramazanovty Turan ýniversiteti jataqhanasyndaǵy kórshisi soqqyǵa jyqqan. Samat kórshisinen terezeni ashpaýyn, temeki shekpeýin ótingen. Sodan ekeýiniń arasyndaǵy sóz talastyń arty tóbeleske aparǵan. Samatty Óserov uryp jyqqan. Bul oqiǵadan soń jataqhanaǵa eki ret jedel járdem shaqyrylǵan» dedi Elmira Alieva.
Samat Ramazanov Ulttyq pediatriia jáne balalar hirýrgiiasy ortalyǵynyń balalar onkologiiasy bóliminde saiqymazaq bolyp jumys jasaidy. Týabitti tuqymqýalaityn mýkopolisaharidoz dertimen aýyrady. Qazir Samat Ramazanov Bostandyq aýdany politsiia basqarmasyna aryzdanyp qoidy.
Bul derekti qalalyq Politsiia departamenti rastady.
«Ramazanovtyń aryzyn Bostandyq aýdandyq politsiia basqarmasy qabyldap aldy. Qazir tergeý amaldary júrip jatyr. Tergeý aiasynda sot meditsinalyq saraptama taǵaiyndalady. Saraptama qorytyndysyna sáikes protsessýaldy sheshim qabyldanatyn bolady» dedi qalalyq Politsiia departamentinen.
Al dárigerler Samattyń jaǵdaiyn ortasha dep baǵalap otyr.
«Patsienttiń basy jaraqattanǵan. Betinen soqqy alǵan. Qajetti meditsinalyq kómekti qabyldap jatyr. Neirohirýrgiialyq bólimge jatqyzyldy» dedi qalalyq Qoǵamdyq densaýlyqty saqtaý basqarmasynan.
