Foto videokadrdan skrinshot jasalǵan
Almatyda moped mingen bala kólikke soqtyǵysty. Oqiǵa kóshedegi beinebaqylaý kamerasyna túsip qalǵan, dep habarlaidy «Ult aqparat» Stan.kz saityna silteme jasap.
Kadrlar qiylysta mopedtiń bar jyldamdyqpen kólikti soqqanyn kórsetedi. Kólik júrgizýshisi kólikten shyǵyp, jábirlenýshige kómektespekshi bolǵan.
Video pikir bildirgen qoldanýshylar balanyń ómirine alańdaýly. Óitkeni soqqy aitarlyqtai aýyr bolyp kórindi.
"Qurmetti ministrler, depýtattar, májilismender, taǵy kim bar, balalardy moped minýge qashan tyiym salasyńdar? Álde taǵy qansha bala ólýi kerek?", "Balasyna moped satyp alǵysy keletin taǵy kim bar?", "Kámeletke tolmaǵandar úshin bul mopedter men skýterlerge qashan tyiym salynady?", “Moped alyp bergen ata-analary kináli”, ”Ata-anasyn jaýapqa tartý kerek”, – dep jazdy oqyrmandar.
Almaty politsiia departamentiniń málimetinshe, jol apaty 17 maýsymda bolǵan.
"Behterev pen Aviatskaia kósheleriniń qiylysynda Mitsubishi kóligi men mopedtiń qatysýymen jol apaty bolǵan. Oqiǵa saldarynan 14 jastaǵy jasóspirim zardap shekti. Qazir jol apatyn Túrksib aýdandyq ishki ister bóliminiń qyzmetkerleri tekserip jatyr", – dep habarlady Almaty politsiia departamentiniń baspasóz qyzmeti.
Eske salaiyq, buǵan deiin Qazaqstandaǵy mopedisterge júrgizýshi kýáligin alýǵa jáne mopediń tirkeýge alty ai ýaqyt berilgenin jazdyq. Májilis "Jol júrisi týraly" zańǵa jáne ákimshilik quqyq buzýshylyq týraly kodekske kólik quraldarynyń jekelegen túrleriniń júrýin uiymdastyrý jáne jol qaýipsizdigin tsifrlandyrý máseleleri boiynsha zańnamalyq túzetýlerdi ekinshi oqylymda qabyldady.
