Almaty ákimdiginiń óńirlik kommýnikatsiialar ortalyǵynda múlik ieleriniń birlestigin, kondominiým qurý jáne tirkeý algoritmine arnalǵan onlain brifing ótti, dep habarlaidy "Ult aqparat".
Eske salaiyq, 2020 jyldyń 7 qańtarynda Múlik ieleriniń birlestigin, kondominiým qurý jáne tirkeý týraly zań qabyldandy. Osylaisha, qala turǵyndary PIK ornyna kondominiým obektisin basqarýdyń jańa nysanyn — múlik ieleriniń birlestigin nemese kóppáterli úidiń jai seriktestigin tańdaýǵa mindetti.
Almaty qalasy turǵyn úi saiasaty basqarmasy basshysynyń orynbasary Meiirjan Otynshievtiń aitýynsha, Almatyda bul baǵytta belsendi jumys júrgizilýde.
Algoritm boiynsha turǵyndar kelý tártibimen páter ieleriniń, turǵyn emes úi-jailardyń jinalysyn ótkize alady, onyń barysynda múlik ieleriniń birlestigin qarapaiym seriktestik qurý týraly sheshim qabyldanady.
Bul rette, MIB qurý úshin jalpy jinalysqa qatysýshylardyń nemese jalpy pikiri suralǵandardyń jartysynan astamynyń, iaǵni barlyq páter ieleriniń keminde 26% - nyń kelisimi qajet.
«Qazirgi ýaqytta kúrdeli epidemiialyq jaǵdaidy eskere otyryp, qala turǵyndaryna saýalnamany jazbasha júrgizýge kóshý jáne talqylaýlardy áleýmettik jeliler men messendjerler arqyly júrgizý usynyldy. Sondai-aq, sanitarlyq-epidemiialyq talaptardy saqtai otyryp, páterler, turǵyn emes úi-jailar ieleriniń jinalystaryn ótkizý kestesi jasaldy», - dedi Meiirjan Otynshiev.
Jinalystardyń ótkizilý kestesin qalanyń turǵyn úi saiasaty basqarmasynyń resmi saitynan jáne áleýmettik jelilerinen tabýǵa bolady.
«Azamattarǵa arnalǵan úkimet «Memlekettik korporatsiiasy» KE AQ Almaty qalasy boiynsha filialynyń Medeý aýdandyq halyqqa qyzmet kórsetý bóliminiń basshysy Madina Amanovanyń aitýynsha, múlik ieleriniń birlestigin tirkeý úshin qujattardyń eń az paketi qajet.
HQO-ǵa myna qujattardy tapsyrý arqyly MIB tirkeýge bolady:
- MIB atynan ótinish;
- jinalys hattamasy;
- tiptik jarǵy;
- 1 AEK mólsherinde tirkeý alymyn tóleý týraly túbirtek (2 778 teńge).
Tirkeý rásimi 5 jumys kúnin alady.
Kondominiým obektisin tirkeýge keletin bolsaq, ol úshin turǵyn úi-jailardyń keminde eki menshik iesinen ótinish qajet, sondai-aq 2 405 teńge mólsherinde tirkeý alymy tólenedi. Ótinishti qaraý merzimi eki jumys kúni.
Tirkeýshi organ turǵyn úi qatynastary týraly Zańǵa sáikes quqyqtyq kadastrǵa málimetter engizedi.
Sonymen qatar, tirkeý internet jelisi arqyly berilgen elektrondyq ótinish negizinde júrgizilýi múmkin. Bul protsedýra tolyǵymen jeńildetilgen.
«Eger buryn kondominiým nysanyn tirkeý úshin jer ýchaskesine quqyq belgileitin sáikestendirý qujatyn berý, sondai - aq úlesterdi esepteýdi júrgizý qajet bolsa, qazirgi ýaqytta tirkeýshi organ osy rásimdi elektrondyq júie arqyly ózdiginen júzege asyrady», - dep atap ótti «Azamattarǵa arnalǵan úkimet» memlekettik korporatsiiasy» KEAQ Almaty qalasy boiynsha filialynyń tirkeý basqarmasy basshysynyń orynbasary Jarqyn Ótegenov.
Óz kezeginde, Almaty qalasy ádilet departamentiniń zańdy tulǵalardy tirkeý boiynsha jumysty uiymdastyrý bóliminiń basshysy Aqerke Qojahmetova basqarýdyń jańa formalaryn tirkeý kezinde tirkeýshi organdardyń qandai máselelerge tap bolatyny týraly aityp berdi.
«Búgingi tańda tirkeý barysynda keibir suraqtar týyndaidy. Tirkeýshi organ kóbinese durys jasalmaǵan hattamalarmen, hattamalarda kvorýmnyń bolmaýymen ushyrasady. Iaǵni, olar ótkizetin jinalysta menshik ieleriniń kvorýmy kóbine zańda kórsetilgennen az bolady. Sol sebepti tirkeý merzimderin toqtata turýǵa jáne túzetý úshin azamattarǵa qaita jiberýge týra keletin kezder bolady. Sondai-aq, turǵyndar eki MIB-ti bir zańdy mekenjaiǵa tirkegen kezde qiyndyqtar týyndaidy. Iaǵni, turǵyndar bir turǵyn úide eki MIB tirkeýge tyrysady, bul zańǵa qaishy», - dedi A.Qojahmetova.
Úidi basqarýdyń jańa formalaryn qurý jáne tirkeýge qatysty suraqtar týyndaǵan jaǵdaida turǵyndar «Azamattarǵa arnalǵan úkimet» memlekettik korporatsiiasynyń 1414 biryńǵai bailanys ortalyǵyna júgine alady.
