Almatyda epidemiologiialyq jaǵdaidyń nasharlaýyna bailanysty mektep oqýshylary 17 qańtardan bastap qashyqtan oqytý formatyna kóshedi.
Bul týraly Almaty qalasy bilim basqarmasynyń basshysy Lázzat Jylqybaeva aitty, dep habarlaidy QazAqparat.
«Almaty qalasynynyń Bas memlekettik sanitarlyq dárigeriniń 13 qańtardaǵy qaýlysymen mektep oqýshylary 17 qańtardan bastap qashyqtan oqytý formatyna kóshedi. Oqý protsesin qashyqtan uiymdastyrý úshin barlyq qajetti jaǵdailar jasalǵan, atap aitqanda, oqýshylar kompiýterler men noýtbýktermen qamtamasyz etilgen. Qalada internetke qatysty jaǵdai turaqty, mektepterdiń internetke qosylýy qamtamasyz etilgen», - dedi ol.
Sondai-aq onyń aitýynsha, ata-analardyń qosymsha kompiýter nemese noýtbýkke, internetke qatysty suraqtary boiynsha mekteptiń birinshi basshylaryna nemese aýdandyq bilim bólimderiniń basshylaryna habarlasa alady jáne olar atalǵan máselelerdi sheshýge kómektesetin bolady.
Búginde oqytýdyń platformalary anyqtalǵan (Online Mektep, Bilim Land, Microsoft Teams). Sonymen qatar, oqýshylarǵa yńǵaily bolý úshin buryn paidalanǵan platformalardy mektepter ózderi tańdap, oqytý barysynda qoldana alady.
«Bizde qashyqtan jumys isteý tájiribemiz bar, muǵalimder ótken jyly tsifrlyq saýattylyq kýrstarynan ótti jáne óz jumystaryn onlain rejiminde jetildiretin bolady», - dep atap ótti Lázzat Jylqybaeva.
