Almaty qalasynyń prokýratýrasy tekseris barysynda balalardyń qaýipsizdigi salasynda birqatar zańbuzýshylyqty anyqtady, dep habarlaidy "Ult aqparat".
Oǵan aqparattyq qaýipsizdik salasyndaǵy jarty myńnan astam zańbuzýshylyq, balalardy tasymaldaý jáne bilim berý mekemelerin qorǵaý erejeleriniń, sanitarlyq jáne órtke qarsy normalardyń buzylýy, sondai-aq oqýshylar arasynda býlling faktileriniń anyqtalýy dálel.
Tekserý nátijesinde 10 sotqa deiingi tergep-tekserý bastalyp, shamamen 60 mln teńge óteldi, 67 qadaǵalaý aktisi engizildi jáne 100-den astam adam ákimshilik jaýapkershilikke tartyldy.
Budan basqa, quqyq buzýshylyqtarǵa jedel den qoiý maqsatynda, onyń ishinde oqýshylar arasyndaǵy býllingke qatysty, oqýshylar nemese olardyń ata-analaryna onlain rejimde qalalyq prokýratýraǵa tikelei júginýge múmkindik beretin QR-kod ázirlendi.
Mektep psihologtarynyń biliktiligin arttyrý maqsatynda qala prokýratýrasy NGS Jańa býyn mektebi alańynda memlekettik mektepterdegi barlyq psihologtyń, kámeletke tolmaǵandardyń isteri jónindegi ýchaskelik inspektorlardyń jáne bilim basqarmasy ókilderiniń qatysýymen seminar uiymdastyrdy.
Sonymen qatar prokýrorlar 330 mln teńgeden astam somaǵa biýdjet qarajaty urlanǵanyn anyqtady.
Mysaly, Bostandyq aýdanynyń prokýratýrasy mektepterdiń birinde jalaqyǵa arnalǵan biýdjet qarajatyn bas býhgalterdiń urlaǵanyn anyqtady.
Atalǵan quqyq buzýshylyq memleketke 160 mln teńge zalal keltire otyryp, mekteptiń jumys istemeitin qyzmetkerlerine jáne óziniń jaqyn týystaryna aqsha qarajatyn aýdarý jolymen jasalǵan.
Osyǵan uqsas urlyq faktilerin Medeý, Almaly, Túrksib jáne Alataý aýdandarynyń prokýrorlary anyqtady.
Qazir sotqa deiingi tergep-tekserý amaldary júrgizilip jatyr.
