Almatyda koronavirýspen kúresip jatqan meditsina qyzmetkerlerine ústemeaqy tóleý úshin 1 mlrd teńgeden asa qarajat bólindi. Bul týraly «Áleýmettik meditsinalyq saqtandyrý» qorynyń Almatydaǵy bólimshesiniń basshysy Nurlybek Qabdyqaparov aitty, dep habarlaidy QazAqparat.
Bólimshe direktorynyń aitýynsha, qazir ústemeaqy alatyn mamandardyń tizimi jazylyp jatyr.
«Búginde bizdiń meditsina qyzmetkerlerine ońai emes. Olar óz densaýlyqtaryn qaterge tigip, qyzmet kórsetip jatyr. Prezidenttiń tapsyrmasymen memlekettik biýdjetten materialdy kómek retinde 212 myń teńgeden 850 myń teńge arasynda qarajat qarastyrylyp jatyr. Qor qarjylyq operator retinde bul aqshany meditsinalyq uiymdarǵa aýdaratyn bolady», - dedi Nurlybek Qabdyqaparov.
Qalalyq Qoǵamdyq densaýlyqty saqtaý basqarmasynyń buiryǵyna sáikes 2020 jyldyń naýryzynda Almatyda 15 densaýlyq saqtaý uiymy tirkelgen.
Ústemeaqy osy uiymdarda isteitin 3557 adamǵa (502 dáriger, 1742 orta medpersonal, 549 kishi medpersonal, 764 basqa da qyzmetkerge) tólenedi.
Búginde 13 uiymnyń qyzmetkerine qarajat jiberildi. Olardyń arasynda I.Jekenova atyndaǵy infektsiialyq aýrýhana, Balalar juqpaly aýrýlar aýrýhanasy, Jedel járdem meditsinalyq qyzmeti bar.
Tólemder 3 kúrdelilik sanaty boiynsha júrgiziledi. Birinshi topqa COVID-19 koronavirýsy bar patsientterge meditsinalyq kómek kórsetý úshin anyqtalǵan reanimatsiia bólimsheleri men basqa da statsionarlardy qosa alǵanda, infektsiialyq statsionarlardyń dárigerleri, orta jáne kishi meditsina qyzmetkerleri jatqyzylǵan.
Bul qyzmetkerlerge tólenetin ústemeaqy mólsheri respýblikalyq biýdjet týraly zańda biylǵy qarjy jylyna belgilengen ailyq jalaqynyń jiyrma eselengen eń tómengi mólsherinen aspaidy.
Ekinshi topqa provizorlyq statsionarlardyń dárigerleri, orta jáne kishi meditsina qyzmetkerleri, jedel meditsinalyq kómektiń dárigerleri men feldsherleri, onyń ishinde ambýlatoriialyq-emhanalyq uiymdar, sondai-aq tartylǵan jaǵdaida sanitarlyq aviatsiianyń dárigerleri men orta meditsina qyzmetkerleri jatqyzylǵan.
Bul toptaǵy qyzmetkerlerge tólenetin ústemeaqy mólsheri respýblikalyq biýdjet týraly zańda biylǵy qarjy jylyna belgilengen ailyq jalaqynyń on eselengen eń tómengi mólsherinen aspaidy.
Úshinshi topqa karantindik statsionarlardyń dárigerleri, orta jáne kishi meditsina qyzmetkerleri, meditsinalyq jedel járdem brigadalarynyń júrgizýshileri, sondai-aq zerthanalardyń mamandary, epidemiiaǵa qarsy is-sharalardy júrgizýge tikelei qatysatyn sanitariialyq-epidemiologiialyq qyzmet jumyskerleri, jiti respiratorlyq virýstyq infektsiialary, pnevmoniiasy bar patsientterdi qabyldaýǵa jáne epidemiiaǵa qarsy is-sharalarǵa bailanysty biologiialyq materialdy alýǵa aiqyndalǵan shuǵyl statsionarlardyń qabyldaý bólimsheleriniń jáne meditsinalyq-sanitariialyq alǵashqy kómek uiymdarynyń qyzmetkerleri, Tótenshe jaǵdai jónindegi jedel shtabtyń jáne oblystar, respýblikalyq mańyzy bar qalalar men astana ákimdikteriniń aýmaqtyq shtabtarynyń músheleri, sondai-aq blokbeketterde karantindik rejimdi qamtamasyz etetin densaýlyq saqtaý qyzmetkerleri jatady.
Eske sala keteiik, QR Prezidenti Qasym-Jomart Toqaev dárigerlerdi qarjylai qoldaýdyń jańa paketi týraly aitqan edi.
