Almaty ákimi Baqytjan Saǵyntaev halyqqa esep berý kezdesýinde qalada turǵyn úi keshenderin salatyndarǵa qatań talap qoiylatynyn aitty, dep habarlaidy QazAqparat.
Onyń aitýynsha, Almatyda turǵyn úi keshenin salýshylarǵa balabaqsha men mektep salý mindetteledi.
«Endi ákimdikke josparymen kelgen kásipkerlerden talap etemiz. Eger josparǵa mektep kirmese, onda qurylysqa ruqsat etilmeidi. Bizdiń talap - mektepterge, balabaqshalarǵa jáne shaǵyn ambýlatoriialarǵa degen suranysty qanaǵattandyrý. Tek osy qaǵidaǵa sai sheshim shyǵaramyz», - deidi ákim.
Bul printsip qazirdiń ózinde qoldanylady. Mysaly, Alataý aýdanynda 22 úiden turatyn «Mádeniet» turǵyn úi kesheni salynyp jatyr. Onda jobaǵa sai 120 oryndyq balabaqsha qurylysy qarastyrylǵan.
«Qairat» shaǵyn aýdanynda № 41 úidiń qurylysy bastaldy, jobada 1 500 oryndyq mektep, 260 oryndyq balabaqsha men emhana bar.
«Demalys oryndaryn jaqsartý jáne qurý maqsatynda aýlalar jóndelýde, oiyn jáne sport alańdary qurylýda. Mysaly, M.Áýezov aýdanynda 2020 jyly 205 aýla, 9 skver jóndeldi, 5 bos ýchaske, 2 jaǵalaý aimaǵy abattandyryldy, 10 shaǵyn aýdandaǵy jaiaý júrginshiler aimaǵy jóndelýde. Sondai-aq, bul aýdanda bir kezderi qaraýsyz qalǵan ýchaskelerde skverler men kósheler boiynda 10 sport alańy salyndy, aýlalardy jóndeý kezinde taǵy 50 alań quryldy», - deidi Baqytjan Saǵyntaev.
