Almatyda Buqtyrma - Qulja avtojolynyń qiylysyndaǵy jolaiyryq 2022 jyldyń alǵashqy jartysynda paidalanýǵa beriledi. Bul týraly qalalyq politsiia departamenti málim etti, dep habarlaidy QazAqparat.
Qulja tas joly men Buqtyrma kósheleriniń qiylysynda júrgizilip jatqan qurylys-montajdaý jumystary jáne jer telimderin memleket quzyryna qaitarý men biýdjettik qarjynyń jumsalýy kórsetilgen keste boiynsha atqarylýda.
«Qazirgi tańda, jolaiyryq qurylysy boiynsha ainalma joldar men 14 tirek nysan jáne soltústik baǵytqa qarai júretin estakada jumystary tolyq aiaqtaldy. Jer asty ótkeli boiynsha estakada nysanynyń armotopyraqty tirek qabyrǵalary jáne ońtústik baǵyt boiynsha injenerlik júieleý jumystary júrgizilip jatyr. Sonymen qatar, soltústik estakada boiymen Qulja tas joly kólikterge ashylyp, jol júrý birshama jeńildedi», - deidi Almaty qalalyq PD Ákimshilik politsiia basqarmasynyń bastyǵy Nurlan Amanbek.
Basqarma bastyǵynyń aitýynsha, 2022 jyldyń alǵashqy jartysynda atalaǵan jolaiyryq boiynsha barlyq baǵyttaǵy joldar ashylady. Qurylys jumystary 2022 jyldyń 4 toqsanynda aiaqtalady.
