Almatyda kúndelikti ósim kórsetkishi 2% bolǵanda karantin sharalary jeńildetiledi. Bul týraly qalanyń bas sanitar dárigeri Jandarbek Bekshin aitty, dep habarlaidy QazAqparat.
«Tamaqtaný salasyndaǵy shaǵyn jáne orta biznes sýbektilerine qatysty karantin talaptary saqtalady. Dámhanalar, ashanalar, meiramhanalar tek úige jetkizý qaǵidasymen jumys isteidi. Jalpy alǵanda, karantin sharalary epidemiologiialyq ahýalǵa bailanysty qalyptasady. Eger koronavirýs infektsiiasynyń kúndelikti ósimi 2%-ǵa jetse, karantin sharalary jeńildeidi. Al qazir qalada sońǵy 7 kúnde ósim 3,8 % bolyp otyr», - dedi Jandarbek Bekshin.
Onyń aitýynsha, saýda oiyn saýyq ortalyqtary ázirge jabyq bolady.
Aita keteiik, sáýirdiń sońǵy onkúndiginde ósim kórsetkishi 6% bolǵan edi.
