Almatyda 7 adam koronavirýs infektsiiasyn eń kóp adamǵa juqtyrǵan. Bul týraly onlain brifing barysynda qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Aizat Moldaqasymova aitty, dep habarlaidy QazAqparat.
Onyń aitýynsha, júrgizilgen taldaýlarǵa sáikes Almatyda 7 adamda KVI patogendi-agressivti formasy anyqtalǵan.
«Olar eń kóp adamǵa juqtyrǵan. Kópshiliginiń aýrýy orta dárejede. Al qalǵany jeńil formada ótip jatyr. Sonymen qatar almatylyqtar arasynda simptomy bilinbei ótip jatqandar da bolýy múmkin. Sol úshin qazir qaladaǵy barlyq JRVI, tumaý, ókpeniń qabynýymen túsken naýqastardyń barlyǵyn koronavirýs infektsiiasyna tekserip jatyrmyz. Eresekter arasynda osyndai 1 jaǵdai tirkeldi. Pnevmoniiamen túsken adamnan infektsiia tabyldy. Keshe 13 bala tekserildi. Onyń 5-inde taldaý rastalmady. Qalǵany áli tekserilip jatyr. 5 naýqastyń 3-inde koronavirýs infektsiiasy aýyrǵan adamdardan juqqan bolsa, eki adamnyń aýrýdy qalai juqtyrǵany belgisiz bolyp otyr», - dedi Aizat Moldaqasymova.
Departament basshysy qala turǵyndaryna belgilengen 14 kún karantindi sabyrmen ótkizýge shaqyrdy.
«Ne úshin biz 14 kún dep alamyz? Sebebi bul infektsiianyń inkýbatsiialyq kezeńine sáikes keledi. Bizde bir naýqas boldy. 14 kún karantinde jatqanda test únemi virýs joqtyǵyn kórsetip kelip, 12-táýlikte bir-aq kórinis bergen. Sondyqtan, 14 kún shydaý kerek», - dedi A.Moldaqasymova.
