Qazir jiti respiratorlyq virýstyq infektsiia taraityn kezeń, soǵan bailanysty qalada syrqattanýshylar sany kóbeidi. Bul týraly onlain brifing barysynda Almaty qalasy sanitariialyq-epidemiologiialyq baqylaý departamenti basshysynyń mindetin atqarýshynyń orynbasary Sádýaqas Baiǵabylov aitty, dep habarlaidy QazAqparat.
Onyń aitýynsha, osy jyldyń 1 qyrkúieginen beri JRVI-diń 114 679 jaǵdaiy tirkeldi, ótken jyly 36 325 jaǵdai bolǵan.
«Biyl qalada tumaýdyń H3N2 nusqasy 48 adamda anyqtaldy. Kúzde 174 373 adam tumaýǵa qarsy vaktsina saldyrdy. Onyń ishinde 161 495 adam ekpeni biýdjet esibinen tegin aldy», - deidi Sádýaqas Baiǵabylov.
Sonymen qatar, ol ótken aptada koronavirýs juqtyrǵandardyń 75,7%-y 20 jastan asqan turǵyndar ekenin jetkizdi.
«Ótken aptada mekeme jumysshylary arasynda virýsty juqtyrý jaǵdaiy ósken, máselen JShS, JK jumysshylary arasynda juqtyrý 21 paiyzdan 25%-ǵa deiin, zeinetkerler arasynda 20-dan 24 paiyzǵa deiin ósti. Degenmen, stýdentter arasynda virýsty juqtyrý 3%-dan 2,4%-ǵa deiin tómendedi, al oqýshylar arasynda 11-den 6%-ǵa azaidy», -dedi ol.
Koronavirýs juqtyrǵan oqýshylardyń 94 paiyzy indetti synyptan emes, otbasynda juqtyrǵany belgili boldy.
