Almatyda Óńirlik kommýnikatsiialar qyzmeti alańynda qalalyq Politsiia departamentiniń basshysy Qanat Taimerdenov karantin rejiminiń talaptaryn naqtylady, dep habarlaidy "Ult aqparat".
«Qala garnizonynnyń jeke quramy qyzmet etýdiń kúsheitilgen deńgeiine kóshti. Qazirgi tańda Departament tarapynnan koronavirýstyq infektsiianyń aldyn alýǵa jáne oǵan tosqaýyl qoiýǵa baǵyttalǵan sharalar jasalýda.
Basqa da memlekettik organdarmen birige otyryp, infektsiia juqtyrǵan azamattarmen qarym-qatynasta bolǵan tulǵalardy izdestirýde. Búgingi kúni osyndai 798 azamat anyqtalyp, olar meditsinalyq mekemelerge jetkizildi», - dedi Qanat Taimerdenov.
Onyń aitýynsha, qaladaǵy asa mańyzdy memlekettik nysandar men mekemeler táýlik boiynda kúzetke alynǵan.
Qalalyq Politsiia departamentiniń basshysy karantin rejimine qatysty jasalǵan sharalarǵa toqtaldy.
«Almatynyń shekarasynan avtakólikterdiń kirip - shyǵýyna shekteý qoiylady, osyǵan bailanysty qalanyń barlyq kireberisine jáne 10 magistralǵa 27 blok beket qoiylady, ol jerge kúndelikti politsiia qyzmetkerleri men Qorǵanys ministirliginiń sarbazdary jumyldyrylady.
Politsiia departamentinde koll ortalyq qurylyp, azamattardyń barlyq suraǵyna jedel jaýap beriledi. Qurmetti azamattar sizderden IIO tarapynan jasalyp jatqan sharalarǵa túsinistikpen qaraýyn suraimyz. Óitkeni olar sizdiń jáne jaqyndaryńyzdyń qaýipsizdigine baǵyttalǵan», - dedi Qanat Taimerdenov.
Sonymen qatar, onyń aitýynsha, azamattardyń suraqtaryna jaýap berý úshin 254 40 07 nómirli qaýyrt jeli iske qosyldy.
Aita ketý kerek, Almaty men Nur-Sultan qalalarynda karantin rejimi engiziledi.
