Almatyda koronavirýs juqtyrǵan júkti áiel aman esen bosandy. Balaǵa virýs juqpaǵan, dep habarlaidy "Ult aqparat".
Qalalyq Qoǵamdyq densaýlyq saqtaý basqarmasynyń habarlaýynsha, júktiliktiń 36-aptasynda kelgen kelinshekti №1 aýrýhananyń dárigerleri bosandyrǵan.
«Náresteden koronavirýsqa test alyndy. Ol virýs joqtyǵyn kórsetti. Qyz bala qazir balalar bóliminde jatyr», - dedi statsionardyń bas dárigeri Sábit Pazylov.
Qazir anasy men balasynyń jaǵdaiy turaqty.
Aita ketý kerek, 15 sáýirde Almatyda taǵy bir koronavirýs juqtyrǵan kelinshek bosanǵan bolatyn. Salmaǵy 3 keli bolyp týǵan ul bala da virýstan din aman bolyp shyqty.
