Mamandar Almatydaǵy epidemiologiialyq jaǵdai týraly aitty, dep habarlaidy "Ult aqparat".
Búgin, iaǵni 18 naýryzda saǵat 19.00-de COVID-2019 juqpasyn juqtyrǵan taǵy bir áiel anyqtaldy. 37 jastaǵy áiel Frankfýrt - Nur-Sultan - Almaty baǵyty boiynsha 16 naýryzda ushyp kelgen.
Dert juqtyrǵan áiel 14 kúndik úi karantinine alyndy, óitkeni Germaniia «1b» sanatyna jatady. Áiel 18 naýryzda dene temperatýrasynyń 37 gradýsqa deiin kóterilip, tamaǵynyń aýrýynan ózin jaisyz sezinip, jedel járdem shaqyrǵan jáne qalalyq klinikalyq infektsiialyq aýrýhanaǵa jetkizilgen. Qazir onyń jaǵdaiy qanaǵattanarlyq. Almaty qalasy aýmaǵynda áielmen bailanysta bolǵan adamdar oqshaýlandy. Qazirgi kezde Almatynyń infektsiialyq aýrýhanasynda 15 patsient bar. Al balalardyń infektsiialyq aýrýhanasynda 2 bala men sondaǵy bir balanyń anasy em alyp jatyr. Olardyń barlyǵy bekitilgen hattamaǵa sáikes emdelýde, virýsqa qarsy jáne simptomatiialyq terapiia ýaqtyly júrgizilýde. Barlyq patsientterdiń jaǵdailary qanaǵattanarlyq ekeni habarlandy.
Koronavirýs infektsiiasynyń taralýyna jol bermeý úshin myna nusqaýlardy múltiksiz oryndaý qajet:
- qoldy jii jýyp, antiseptikterdi qoldanǵan jón. Qoldy sabynmen árbir jarty saǵat boiyna 20 sekýnd boiy jýý kerek. Eger jaqyn mańda qol jýatyn oryn, sabyn bolmasa, onda mikrobtardy kádimgi antiseptikpen joiýǵa bolady;
- bólmeni jii jeldetý qajet;
- qoǵamdyq oryndardan aýlaq bolǵan jón;
- qol alysýǵa jáne basqa da jaqyn bailanys jasaýǵa bolmaidy;
- immýnitetti kúsheitý qajet;
- sýyq tiiý jáne tumaý aýrýlarynyń belgileri (simptomdary) baiqalsa, ózin jaisyz sezinse, qurǵaq jótel bolsa, onda birden emhanadan dárigerdi nemese jedel járdemdi shaqyrý qajet ári maska kigen jón.
Anyqtama úshin 1406 nómiri boiynsha Call-ortalyq táýlik boiyna jumys isteidi.
Resmi aqparatty áleýmettik jelidegi Almaty qalasy ákimdiginiń saity men resmi paraqshalardan alýǵa bolady. Qosymsha aqparat Telegram-kanaldaǵy Stopcov Almaty jedel jariialanady.
