Almaty dárigerleri koronavirýs juqtyrǵan 12 jasar qyzdyń jaǵdaiy týraly aitty, dep habarlaidy "Ult aqparat".
Qalalyq qoǵamdyq densaýlyqty saqtaý basqarmasynyń habarlaýynsha, qazir qalada 7 adamda koronavirýs juqpasy bar ekeni zerthanalyq jolmen rastalǵan.
«6 patsient eresekterge arnalǵan juqpaly aýrýlar aýrýhanasynda oqshaýlanǵan. Almatyǵa Germaniiadan kelgen 2008 jyly týǵan qyz borttan túsirilip, balalar juqpaly aýrýhanasynda bólek boksqa jatqyzyldy. Qazir onyń jaǵdaiy birqalypty. Bortta ekipajdy qosqanda 12 adam bolǵan. Olardyń barlyǵy oqshaýlanyp arnaiy taldaý alyndy. 7 patsienttiń barlyǵy DDS uiymynyń protokoly boiynsha em qabyldap jatyr. Naýqastarmen bailanysta bolǵan azamattardyń barlyǵy provizorlyq statsionarlarǵa 14 kúndik karantinge jatqyzyldy», - dedi basqarmadan.
Jalpy búgingi kúni Almaty qalasynda 676 adam karantinde jatyr.
Almaty qalasynyń ákimdigi barlyq azamattardy, ásirese, úi karantinindegilerdi osy jaǵdaida óziniń jáne basqalardyń densaýlyǵy úshin barynsha jaýapkershilikpen qarap, sanitarlyq-gigienalyq erejelerdi ustanýǵa, aýrý belgileri baiqalǵan jaǵdaida ózin-ózi oqshaýlaýǵa shaqyrady. Úi karantininde jatqandar oqshaýlaný merzimine shydaýy kerek.
Koronavirýs infektsiiasy taralmas úshin tómendegi erejelerdi ustaný qajet:
- Qoldy jii jýý jáne antiseptik quraldardy paidalaný. Qoldy sabyndy paidalanyp árbir jarty saǵat saiyn 20 sekýnd boiy jýý qajet. Eger jaqyn jerde qol jýatyn shuńǵylsha, sabyn bolmasa, mikrobtardy óltirýge ádettegi antiseptik kómektesedi. Dárihanadan satyp alynǵan kádimgi spirt te bolady. Eger oǵan allergiia bolsa, sanitaizerdi paidalanyńyz.
- Bólmeni jii jeldetińiz.
- Qoǵamdyq oryndarǵa shyǵýdy shekteý qajet.
- JRVI men tumaýǵa, denedegi álsizdik, qurǵaq jótelge kúdikti kezde emhanadan dáriger shaqyrtý nemese járdem shaqyrtý jáne maska taǵý qajet.
- Qol alysýdy jáne basqa da jaqyn qarym-qatynasty boldyrmaý.
- Immýnitetti nyǵaitý.
Anyqtama úshin táýlik boiy 1406 nómiri boiynsha Call-ortalyq jumys isteidi.
Resmi aqparat Almaty qalasy ákimdiginiń saitynda jáne áleýmettik jelileriniń resmi paraqshalarynda qoljetimdi. Qosymsha aqparat Stopcov ALMATY Telegram paraqshasynda jariialanyp otyrady.
