Almatyda koronavirýs juqqan alty adam - bes áiel, bir er adam jazylyp shyqty, dep habarlady coronavirus2020.kz saitynyń Telegram arnasy.
"Ekeýi 16 naýryzda Stambýldan kelgen, ekeýi - 10 naýryzda Máskeý - Almaty reisimen ushyp kelgen. Bir adam 13 naýryzda Berlinnen oralǵan. Bir adamǵa naýqastardan koronavirýs juqqan" delingen habarlamada.
Almatyda barlyǵy 19 adam jazylyp shyqqan. 14 kúndik úi jaǵdaiyndaǵy karantinge jiberilgen.
Qalalyu qoǵamdyq densaýlyq saqtaý basqarmasynyń dereginshe, qalada barlyǵy 109 adamnan koronavirýs tabylǵan. 77 naýqastyń jaǵdaiy - ortasha. Eki eresek naýqastyń hali óte aýyr, bir adamnyń jaǵdaiy - aýyr. 11 adamnyń jaǵdaiy - ortasha aýyr.
4 sáýirde tańerteń densaýlyq saqtaý ministrligi qalada 16 adamnan virýs tabylǵanyn habarlaǵan bolatyn. Olardyń biri jaǵdaiy aýyr kúide aýrýhanaǵa túsken.
Qala boiynsha 655 adam (83 bala) provizorlyq ortalyqtarda jatyr. 4411 adam úi karantininde.
Almaty - virýs juqtyrǵandar sany jaǵynan respýblikada Nur-Sultannan (202) keiin ekinshi tur. 19 naýryzda qalada karantin jariialanyp, qalaǵa kirip-shyǵýǵa tyiym salyndy. 28 naýryzda adamdardyń syrtqa shyǵýyna shekteý qoiyldy. Qala turǵyndary azyq-túlik, dári-dármek satyp alý siiaqty óte qajetti jaǵdaida ǵana kóshege shyǵa alady. Qalada azyq-túlik dúkenderi, dárihanalardan basqa nysandar jabyq.
