Almatyda koronavirýs juqtyrǵandar joq. Bul týraly Almaty Qoǵamdyq densaýlyq saqtaý basqarmasynyń bastyǵy Tileýhan Ábildaev baspasóz máslihatynda aitty, dep habarlaidy "Ult aqparat".
Almaty Qoǵamdyq densaýlyq saqtaý basqarmasynyń bastyǵy Tileýhan Ábildaevtyń aitýynsha, jahandyq epidemiologiialyq jaǵdaidyń nasharlaýyna, kórshi elderde infektsiianyń órshýine bailanysty onyń taraý qaýpiniń aldyn alý úshin qalada kúsheitilgen sharalar júrgizilip jatyr.
Búgingi tańda koronavirýstyń taralý jaǵdailary álemniń 64 elinde tirkeldi.
«Almatydaǵy meditsinalyq uiymdar koronavirýs infektsiiasynyń ákelinýi men taralýyn boldyrmaýǵa arnalǵan epidemiiaǵa qarsy jáne profilaktikalyq sharalardy júzege asyrýǵa tolyqtai daiyn», - dedi Ábildaev.
Shet elden kelýshilerdiń tizimi monitoring ortalyǵyna túsip, aqparattar óńdelip, aty-jónderi boiynsha meditsinalyq mekemelerge ornalastyrylady. Infektsiia kóp taraǵan elderden kelgen azamattar 14 kún boiy kópbeiindi meditsinalyq ortalyqta oqshaýlandyrylyp, karantinde jatady.
Búgingi kúni óńirlik provizorlyq statsionardyń 1 A sanatyna – 131 azamat, 1 V boiynsha – 119 adam, 2-kategoriia boiynsha - 955 jáne 3-kategoriia boiynsha 1632 adam baqylaýǵa alyndy.
«Meditsinalyq uiymdar qajetti dári-dármektermen, qural-jabdyqtarmen, bakteriiaǵa qarsy jáne virýsqa qarsy preparattarmen jáne dezinfektsiialyq quraldarmen qamtamasyz etildi. Barlyq meditsinalyq uiymdarda sanitarlyq zararsyzdandyrǵysh, antiseptikter ornatyldy»,- dedi Tileýhan Ábildaev.
Sondai-aq, alǵashqy meditsinalyq-sanitarlyq kómek kórsetetin mekemeler, kópbeiindi aýrýhanalar men jedel járdem qyzmetkerleri úshin arnaiy oqý-jattyǵýlar ótkizildi.
Eger epidemiologiialyq jaǵdai nasharlasa, Almaty qalasy aýrýhanaǵa jatqyzýǵa jáne karantinge arnalǵan tósek oryndaryn qosymsha ornalastyrýǵa daiyn.
«Barlyq azamattar dárigerlerdiń baqylaýynda jáne aýrýdyń klinikalyq belgileri joq deni saý adamdar. Olardy karantin kezinde juqpaly aýrý boiynsha dárigerler, epidemiologtar qarap, arnaiy belgileri boiynsha respiratorlyq infektsiialarǵa testileýden ótkizedi. 14 kún ótkennen keiin taǵy synama alynyp, ol teris nátije kórsetkende bul azamattar karantinnen shyǵarylady», – dep túsindirdi basqarma basshysy.
Búigingi kúnge deiin, 12 adam úiine shyqty.
Jalpy, Almatyda azamattardan COVID-2019 virýsyn juqtyrǵan birde-bir jaǵdai tirkelgen joq.
