Almatyda qala ákimi Baqytjan Saǵyntaevtyń sheshimimen Almaty qalasy ákiminiń orynbasary Erjan Babaqumarov tóraǵalyq etetin koronavirýs infektsiiasynyń taralýyn eskertý boiynsha óńirlik shtab quryldy, – dep habarlaidy QazAqparat.
Shtab el Úkimetiniń sheshimderin oryndaý jáne Almatyda koronavirýs infektsiiasyn taratýǵa jol bermeý boiynsha ulttyq jospardy júzege asyrý úshin quryldy.
Shtab QR densaýlyq saqtaý ministri Eljan Birtanovtyń jáne Qazaqstannyń bas sanitarlyq dárigeri Jandarbek Bekshinniń is-qimyldy jalpy úilestirýi boiynsha jumys isteidi.
Óńirlik shtabtyń alǵashqy otyrysy barysynda Almaty qalasynda sanitarlyq-epidemologiialyq jáne profilaktikalyq sharalardy kúsheitý máseleleri qaraldy.
Búgingi kúni qalalyq vedomstvoaralyq jospar ázirlendi. Elimizdiń turǵyny kóp megapolisiniń aýmaǵyna koronavirýs infektsiiasynyń enýine jáne taraýyna jol bermeý maqsatynda týristik jáne migratsiialyq lek barlyq baǵytttar boiynsha baqylaýǵa alynǵan. Virýs taraǵan elderden kelgender halyqaralyq áýejai men temirjol vokzaldarynda mindetti túrde termometriiadan ótedi. Ol úshin teplovizorlar men portativti indikatorlar qoldanylady.
Budan bólek, Almaty qalasy betperdelermen, dárilik preparattarmen jetkilikti qamtamasyz etilgen. Meditsinalyq zattardyń qajetti rezervi bar. Jalpy, qaladaǵy jaǵdai turaqty jáne únemi qatań baqylaýda.
Otyrystyń qorytyndysy boiynsha qala ákiminiń orynbasary – shtab tóraǵasy Erjan Babaqumarov ótkizý pýnktterinde baqylaýdy kúsheitý boiynsha birqatar hattamalyq tapsyrmalar berdi.
Memlekettik organdarǵa koronavirýs infektsiiasynyń enýine jáne taraýyna jol bermeý sharalarynyń keshendi josparyn oryndaýdy jáne monitoring júrgizýdi qamtamasyz etý tapsyryldy. Dáriler men meditsinalyq zattardy, onyń ishinde meditsinalyq betperdelerdi ótkizýde baǵalyq kelisimderge jol bermeýdiń barlyq sharalaryn qabyldaý boiynsha jeke tapsyrma berildi.
Óńirlik shtabtyń otyrysy aptasyna bir ret jáne qajet bolǵan jaǵdaida ótetin bolady.
