Foto: Mádeniet jáne aqparat ministrligi
Memleket basshysynyń atynan QR Mádeniet jáne aqparat ministri Aida Balaeva eldiń damýyna eleýli úles qosqan mádeniet jáne óner qairatkerlerine, jýrnalisterge, aqparat salasynyń ókilderine memlekettik nagradalar tabys etti, dep habarlaidy Ult.kz.
«Barshańyzdy elimizdiń ulyq merekesi – Respýblika kúnimen shyn júrekten quttyqtaimyn! Keshe Prezident jarlyǵymen elimizdiń damýyna zor úles qosyp júrgen bir top azamat memlekettik nagradalarmen marapattaldy. Olardyń qatarynda óner qairatkerleri, belgili qalamgerler, ǵalymdar, túrli salanyń ókilderi, eń bastysy qarapaiym eńbek adamdary bar. Bul Memleket basshysynyń qoǵamda eńbekqorlyq pen kásibi biliktilik qundylyqtaryn dáripteý bastamasynyń aiqyn kórinisi ekeni sózsiz,» – dedi ministr.
Qazaqstan Prezidentiniń Jarlyǵymen aqyn Israil Saparbaiǵa «Qazaqstannyń halyq jazýshysy» ataǵy berildi.
«Qazaqstannyń halyq ártisi» ataǵyna teatr ártisteri Jámilia Baspaqova, Olga Korjeva, Lidiia Káden jáne Rihan Mahpirova ie boldy.
«Qazaqstannyń eńbek sińirgen qairatkeri» ataǵy Tatiana Kostiýchenkoǵa, Marziia Mamidoldinaǵa, Safýan Rysbaiulyna, Sergei Popovqa, Ajar Iýsýpovaǵa jáne Oleg Tatamirovqa berildi.
Sonymen qatar birqatar azamattar «Parasat», «Qurmet» ordenderimen, «Eren eńbegi úshin» medalimen jáne Mádeniet jáne aqparat ministrliginiń «Eńbek ardageri» vedomstvolyq medalimen marapattaldy.
