© Photo: QR TJM baspasóz qyzmeti
Almatyda kópqabatty turǵyn úiden órt shyqty, dep habarlaidy "Ult aqparat".
Oqiǵanyń videosy áleýmettik jelidegi paraqshalarda tarap jatyr. Videodan adamdardyń ǵimarattyń terezelerinen sekirgenin baiqaýǵa bolady.
Tótenshe jaǵdailar departamentiniń málimetinshe, 1 tamyz saǵat 17:10-da TJD kúshteri men quraldary joǵary dáreje boiynsha Alataý aýdanynyń Aqkent shaǵyn aýdany 54 úi mekenjaiyna jiberilgen.
"Órt sóndirýshiler 6 minýtta jetip, 16-qabatty úidiń 5-qabatyndaǵy kabeldik shahtada elektr kabelderi 80 sharshy metr alańda ashyq jalynmen janyp jatqanyn anyqtady.
Raiymbek dańǵylynda kólik keptelisi bolǵanyna jáne órt sóndirý tehnikasynyń kireberisi turaqta turǵan kóliktermen shektelgenine qaramastan, alǵashqy órt esepteri 6 minýtta oqiǵa ornynda boldy. Órt saldarynan joǵarǵy qabattarda jáne evakýatsiia joldarynda tyǵyz tútin men joǵary temperatýradan turǵyndardyń densaýlyǵyna qaýip tóndi.
Oqiǵa ornynda shuǵyl gaz-tútinnen qorǵaý qyzmetiniń jumysy uiymdastyryldy. 70 adam qutqaryldy, onyń ishinde - 35 adam qutqarý qalpaqtary arqyly, qalǵan turǵyndar arnaiy tehnikanyń kómegimen. Sondai-aq 300 adam evakýatsiialandy" - delingen habarlamada.
Aldyn ala aqparat boiynsha 30 adam meditsinalyq kómekke júgingen. Dárigerlerdiń qaraýynan keiin odan ári aýrýhanaǵa jatqyzý týraly sheshim qabyldanǵan.
"Órt saǵat 18:46-da sóndirildi. Sebebi anyqtalyp jatyr.
Órtti sóndirýge Almaty qalasy TJD 50 qyzmetkeri men 14 birlik tehnika jumyldyryldy" - delingen TJD habarlamasynda.
Al Almaty densaýlyq saqtaý basqarmasynyń málimetinshe, saǵat 18:30-daǵy jaǵdai boiynsha Alataý aýdany, Aqkent shaǵyn aýdany 54 úi mekenjaiynda bolǵan órt saldarynan qala aýrýhanalaryna 31 adam jetkizilgen, onyń 16-sy - bala. Zardap shekkender arasynda qaza bolǵandar joq. Naýqastardyń densaýlyq jaǵdaiy týraly qosymsha habarlanady.
Videolar: kaskelenkz Instagram paraqshasy, shtor_kansha_almaty Instagram paraqshasy, Tengrinews.kz Telegram arnasy, Sputnik Qazaqstan Telegram arnasy, Sulu Bolek Youtube arnasy, M NEWS Youtube arnasy
