Almaty ákimi Erbolat Dosaev kópqabatty avtoturaqtar salý jobasy týraly aitty, - dep habarlaidy Tengrinews.kz.
Qala ákimi Erbolat Dosaevpen kezdesýde Áýezov aýdanynyń turǵyndary avtoturaq máselesine shaǵymdandy.
"Aýdandarda kólik turaǵy boiynsha úlken máseleler bar. Kósheler bitelip, kólik júretin joldar tolyp, tipti jartylai jabylyp qalady. Nátijesinde, órtsóndirýshiler de, qajet kezde jedel járdem de óte almaidy. Kópqabatty avtoturaqtar qajettiligi týyndap tur", - dedi aýdan turǵyndarynyń biri.
Suraqqa jaýap bergen qala basshysy sheneýnikter jaqyn arada bul máseleni sheshýge "úlken baǵdarlama" daiyndaitynyn atap ótti.
"Jeri jalǵa berilgen kóptegen kólik turaǵy bar. Baǵdarlamany daiyndap bolǵannan keiin, uzaq ýaqyt boiy 50 nemese 100 oryndy turaqtardan aqsha tapqan ielenýshilerge shart qoiǵym keledi. 500 kólikke bes qabat turǵyza alamyz. Aýlalar da bosaidy.
Almaty qalasynda kópqabatty avtoturaqtar salý boiynsha úlken baǵdarlama daiyndalady. Baǵdarlamany jyl aiaǵyna deiin tanystyrýdy josparlap otyrmyz. Bul aýlalardy ishinara bosatady. 2023 jyly jeke investorlarmen jumys istei bastaimyz", - dedi Dosaev.
