Almatyda áleýmettik jaǵynan az qamtylǵan otbasylarda tárbielenetin úzdik oqýshy balalar stipendiia alatyn bolady. Bul týraly Almaty ákimi Baýyrjan Baibek turǵyndar aldyndaǵy eseptik kezdesýinde aitty, dep habarlaidy QazAqparat.
Biyl qala biligi kópbalaly jáne muqtaj otbasylardy qoldaý boiynsha keshendi sharalar modelin qolǵa almaq.
Atap aitqanda, «Baqytty otbasy» baǵdarlamasy aiasynda turmysy tómen januialarda tárbielenip otyrǵan oqýshylar men stýdentterdi qoldaý qolǵa alynǵan.
«Muqtaj otbasylardyń jastaryna stipendiia beriledi. Bul, bilimge degen qushtarlyqty arttyrady. Ýniversitetter men kolledj stýdetterine ai saiyn - 10 myń teńgeden, al mektep oqýshylaryna 5 teńgeden beriledi. Aitpaqshy, biyl elimiz boiynsha bólingen granttardyń 40% nemese 27 myńy Almatyǵa tiesili. Bul jerde biz grantpen oqityndardyń barlyǵyna bólinetin stipendiiany sóz etýdemiz. Árine, bul otbasy úshin qosymsha tabys kózine ainalady», - dedi Baýyrjan Baibek.
Sondai-aq Almatyda turmysy tómen otbasylar úshin ekinshi baladan bastap balabaqsha tegin bolady.
Budan bólek, kópbalaly otbasylar 2 paiyzben baspana ala alady. Megapoliste «Baqytty otbasy» arnaiy turǵyn úi baǵdarlamasy qolǵa alynady. Kezekte turǵan 1276 kópbalaly jáne tolyq emes otbasylardyń alǵashqy jarnany tóleýge múmkindikteri joq. Sondyqtan qala biýdjetinen 1 mln teńgeniń sertifikattary tapsyrylady. Alǵashqy jarna páter qunynyń 10% quraidy, nesie 2% 18 jylǵa beriledi. Nesie jańa úilerdegi quny 15 mln teńge bolatyn shaǵyn páterlerge ǵana beriledi.
