Foto: Qairat Qonysbaev
Almaty qalasynyń kommýnaldyq infraqurylymdy damytý basqarmasynda atalǵan taqyrypta basqarýshy kompaniialar, PIK, MIB/JT, qoǵamdyq uiymdar jáne aýdandyq TKSh bólimderiniń ókilderi qatysty.
Dóńgelek ústeldiń negizi taqyryby retinde Almaty qalasynyń PIK qaýymdastyǵy kóppáterli turǵyn úilerdi basqarý men kútimine arnalǵan minimaldy tarifti qaita qaraýdy usyndy. Talqylaý óte keń aýqymda ótti. Bul bastama turǵyndardyń qolaily ómir súrý jaǵdailaryn jaqsartyp, qaýipsizdikti arttyrý úshin qajet. Sońǵy on jyldan beri tarif deńgeii ózgermegendikten, qazirgi jaǵdaida úilerdi tiisti deńgeide kútip-ustaý qiynǵa soǵýda.
Foto: Qairat Qonysbaev
Almatyda tarif mólsheri ár sharshy metr úshin 7-den 700 teńgege deiingi aralyqty qamtidy. Biraq ortasha kórsetkish nebári 40 teńgeni quraidy. PIK qaýymdastyǵy tóraǵasy Arkadii Rýbtsovtyń aitýynsha, mundai tarif turǵyn úilerdi sapaly kútimmen qamtamasyz etýge jetpeidi. Nátijesinde tehnikalyq qyzmet kórsetý, dezinfektsiia, deratizatsiia jáne jóndeý jumystary jetkilikti deńgeide oryndalmaidy. Jańa standarttar basqarýshy kompaniialarǵa turǵyndardyń qaýipsizdigin qamtamasyz etý úshin qosymsha sharalardy talap etedi. Bul taǵy da qarjy máselesin týyndatady. Sondyqtan minimaldy tarifti arttyrý turǵyn úilerge sapaly qyzmet kórsetýge múmkindik beredi jáne basqarýshy kompaniialarǵa tiimdi jumys isteýge jaǵdai jasaidy. Qaýymdastyqtyń pikirinshe, tarifti kóterý tek turǵyndardyń qolaily turmysyn qamtamasyz etip qana qoimai, basqarý protsesiniń tiimdiligin arttyrady.
Foto: Qairat Qonysbaev
Almaty qalasyndaǵy «Turan» menshik ieleri kooperativteri qaýymdastyǵynyń tóraiymy Bibigúl Júnisbaeva kóppáterli turǵyn úilerdi kútip-ustaýǵa arnalǵan tarifterdiń jetkiliksizdigi máselesin birneshe jyldan beri kóterip keledi. Onyń aitýynsha, bul másele ásirese eski turǵyn úilerge qatysty ózekti bolyp otyr. B. Júnisbaevanyń sózine qaraǵanda, eski turǵyn úilerdiń kútimi úshin tarifter tym tómen. Mysaly, keibir aýdandarda tarifter sharshy metrine nebári 25-40 teńgeni quraidy. Mundai tarifter qajetti jóndeý jumystaryn júrgizýge, úilerdi tiisti deńgeide kútip-ustaýǵa, turǵyndarǵa jaily jaǵdai jasaýǵa múmkindik bermek. Tarifterdiń tómendigine qosa, qurylys materialdarynyń baǵasynyń ósýi de jaǵdaidy kúrdelendirýde. Keiingi bir jyldyń ishinde qysqy maýsymǵa daiyndyq úshin qajet qulyptaý armatýrasynyń baǵasy 30%-ǵa qymbattaǵan.
Foto: Qairat Qonysbaev
B. Júnisbaeva tariftik saiasatty qaita qaraý qajet dep esepteidi. Ol tarifti arttyrýdyń bir joly retinde turǵyndar jinalysynda bul máseleni talqylaýdy usynady. Alaida tarifti kóterýdiń mańyzdylyǵyna sendirý árdaiym ońai bola bermeidi. Sondyqtan ol turǵyndarǵa qarajattyń qalai jumsalatynyn naqty túsindirip, jeke qajettilikterin eskerýdi mańyzdy dep sanaidy.
Almatyda turǵyn úilerdi kútip-ustaý tarifterin arttyrý – úilerdi qaýipsiz ári qolaily jaǵdaida saqtaý úshin mańyzdy qadam ekenin atap ótti. Tarifterdi qaita qaraý arqyly eski turǵyn úilerdiń jaǵdaiyn jaqsartyp, turǵyndardyń ómir súrý sapasyn arttyrýǵa múmkindik týmaq.
