video kadry
Almatyda kólikke aǵash qulaǵan sát videoǵa túsip qaldy.
Oqiǵa jolda baǵdarshamǵa toqtap turǵan kóliktiń baqylaý kamerasyna jazylǵan.
Almaty Tótenshe jaǵdailar departamenti málimetinshe, oqiǵa Qaldaiaqov pen Bógenbai batyr kósheleriniń qiylysynda bolǵan.
«Almaty ákimdigi Qutqarý jumystary qyzmetiniń «109 pýltine» Medeý aýdanyndaǵy Qaldaiaqov kóshesi men Bógenbai batyr dańǵylynyń qiylysynda aǵash qulaǵany jaily habar kelip tústi.
Aqparat boiynsha, aǵash kóliktiń ústine qulaǵan. Zardap shekkender joq», - dep habarlady jergilikti TJD baspasóz qyzmeti.
Joldy tazartý úshin Qutqarý qyzmetiniń kúshteri men quraldary jáne «102» qyzmetkerleri jiberilgen.
«Aldyn ala málimetter boiynsha, jaýyn-shashynnyń kóp túsýi aǵash tamyr júiesiniń túbindegi topyraqtyń batpaqtanýyna ákeldi. Qazirgi ýaqytta merdiger uiym qulaǵan aǵashty joldan jinaý jumystaryn júrgizip jatyr.
Almaty qalasynyń aýmaǵynda jasyl jelekterdi túgendeýge sáikes 84 myńnan astam avariialyq aǵashtar bar. Olardyń 35 myńy kóshe boiynda, 49 myńy aýla aýmaqtarynda ósip tur. Jumys jospary boiynsha 2022 jyly magistraldyq joldar boiynda, saiabaq aimaqtarynda jáne aýlaishilik aýmaqtarda 5 myń dana apatty aǵash kesildi. Kesilgen aǵashtardyń ornyna 50 myń dana jas kóshet otyrǵyzyldy», - dep habarlady Almaty qalasy ákimdiginiń baspasóz qyzmeti.
Biyl ekologiia jáne qorshaǵan orta basqarmasy 16 925 myń dana avariialyq aǵashtardy kesken. Kesilgen aǵashtardyń ornyna 169 250 dana jas aǵash kóshetterin otyrǵyzý josparlanypty.
«Jyl ortasynda basqarma 8 aýdan boiynsha sharttar jasasty, jalpy paidalanymdaǵy aýmaqtarda avariialyq aǵashtardy kesý kestesine sáikes jumys bastaldy. Ǵylymi qyzmetkerlerdi tarta otyryp, avariialyq aǵashtardy kesý jónindegi jumystardy bastamas buryn ekologiialyq jurtshylyqtyń máselelerin sheshý úshin Jazken Jiembaev atyndaǵy Qazaq ósimdik qorǵaý jáne karantin ǵylymi-zertteý institýty qyzmetkerleri men eko-belsendiler avariialyq aǵashty muqiiat tekseredi. Qazirgi ýaqytta qutqarý jáne kommýnaldyq qyzmetter jumys isteidi. Avtokólik ieleri kelgen shyǵyndy ótetkizý úshin politsiiaǵa ótinish berýi kerek», - dedi ákimdiktiń baspasóz qyzmeti.
