Foto: Instagram/almaty_police_department
Almatyda urlanǵan kólik Shymkent qalasynda tabyldy. Kólikti urlaǵan adam osylai isteýge "tapsyrys bergenin" aitqan, - dep habarlaidy "Ult aqparat" Almaty qalasynyń Politsiia departamentine silteme jasap.
Politsiiaǵa "Hiýndai" kóliginiń urlanǵany týraly iesi habarlaǵan.
Áieldiń aitýynsha, tórt saǵattyń ishinde belgisiz bireý onyń "Daraboz" shaǵyn aýdanyndaǵy úilerdiń biriniń aýlasynda turǵan sheteldik kóligin urlap ketken.
"Osy qylmysty ashý maqsatynda qalalyq kriminaldyq politsiia jáne Alataý aýdandyq politsiia basqarmasynyń qyzmetkerleriniń arasynan tergeý-jedel toby quryldy. Biz beinebaqylaý júieleriniń múmkindikterin belsendi túrde paidalandyq, onyń kómegimen, eń aldymen, kólikti urlaǵan adamnyń qozǵalý baǵyty men nómirdi aýystyrý deregi anyqtaldy. Kúdik týdyrmas úshin qaskói urlanǵan kólikke dál sondai "Hiýndai" kóliginiń nómirlerin ornatqan. Jedel izdestirý sharalarynyń tizbegi jedel ýákilderdi Shymkent qalasyna alyp keldi. Kúdikti sol jerde ustaldy", - dedi Almaty politsiia departamenti bastyǵynyń orynbasary, politsiia polkovnigi Didar Ahanov.
Alaida ustalǵan adam - 2000 jyly týǵan K.esimdi azamat, jábirlenýshiniń uly sheteldik kólikti urlaýǵa "tapsyrys bergenin" aityp aqtalǵan. Ekeýi dos bolyp shyqty.
"Biz naqty mán-jaidy, qylmystyń sebebin anyqtaimyz. "Tapsyrys týraly" nusqa da muqiiat tekserilip jatyr. Jastar saqtandyrý tólemderin alý úshin urlyqty josparlaǵan bolýy da múmkin. Sotqa deiingi tergeý jalǵasyp jatyr", - dedi polkovnik Ahanov.
