Almatynyń bas sanitar dárigeri jeke profilaktika sharalaryn saqtap, adam kóp jinalatyn oryndarǵa barmaýǵa shaqyrady, dep habarlaidy "Ult aqparat".
Almaty qalasynyń taýarlar men qyzmetterdiń sapasy men qaýipsizdigin baqylaý departamenti Kók bazar aýmaǵyndaǵy «Kompaniia Dostar-Kommerts» bazary qyzmetkerleriniń arasynda koronavirýs infektsiiasyn juqtyrý oqiǵalarynyń tirkelýine bailanysty tiisti sharalar men epidemiologiialyq zertteý júrgizý úshin Kók bazardyń jumysy toqtaǵanyn habarlaidy.
Almaty qalasynyń bas memlekettik sanitar dárigeri Jandarbek Bekshin kásipkerlik sýbektileriniń karantin rejimin saqtaýyn baqylaý maqsatynda quramynda politsiia departamenti, TQSQBD aýdandyq basqarmalary, «Atameken» kásipkerler palatasynyń ókilderi bar ákimdiktiń monitoring toptary jumys isteitinin atap ótti.
Osyǵan deiin monitoringtik toptardyń tekserýi barysynda Kók bazar aýmaǵynda jumysshylar men satýshylar úshin bailanyssyz termometriianyń saqtalmaýy, áleýmettik qashyqtyqtyń saqtalmaýy jáne kelýshiler arasynda qashyqtyq saqtaý úshin arnaiy belgilerdiń belgilenbeýi, jeke qorǵanys quraldaryn tiissiz qoldaný jáne ýtilizatsiialaý, tiisti jumys rejiminiń oryndalmaýy syndy tártip buzýshylyqtar anyqtaldy.
Anyqtalǵan tártip buzý faktilerine bailanysty QR ÁQtK 425-babynyń 2-tarmaǵyna sáikes hattama toltyrylyp, Medeý aýdanynyń bas memlekettik sanitar dárigeriniń 2020 jyldyń 13 maýsymynan bastap «Kompaniia Dostar-Kommerts» qyzmetin sot sheshimi shyqqanǵa deiin toqtatý týraly qaýlysy shyqty.
Qazirgi ýaqytta ákimshilik istiń materialdary Almaty qalasynyń mamandandyrylǵan ákimshilik sotyna berýge ázirlený ústinde.
Bazar ákimshiliginen koronavirýs infektsiiasyn juqtyrýdyń birinshi oqiǵasyn zertteý barysynda taǵy 19 jaǵdai anyqtaldy, ol da ákimshilik qatarynan shyqqan.
Osylaisha, kók bazarda indetti juqtyrǵan qyzmetkerler sany 20-ǵa jetken. Satýshylar arasynan juqtyrý oqiǵalary anyqtalmady.
Qaitys bolǵan adamǵa qatysty (Bazar ákimshiliginiń uiymdastyrý bóliminiń qyzmetkeri) onyń óliminiń sebepterin qalalyq qoǵamdyq densaýlyq saqtaý basqarmasynyń janyndaǵy ólim sebepterin zertteitin komissiia anyqtaidy.
