Memlekettik qyzmet isteri agenttiginiń Almaty qalasy boiynsha departamenti aǵymdaǵy jyly Ádep jónindegi keńesiniń alǵashqy otyrysyn ótkizdi, dep habarlaidy QazAqparat.
Departament BAQ-qa monitoring júrgizý barysynda Almaty qalasy sanitarlyq-epidemiologiialyq baqylaý departamenti (SEBD) basshysynyń orynbasary Sádýaqas Baiǵabulovqa qatysty teris jariialanymdy anyqtady.
Jiynda málim bolǵandai, Sádýaqas Baiǵabulov «Informburo.kz» aqparattyq portalynda QR Bas memlekettik sanitarlyq dárigeri bolǵan Erlan Qiiasovtyń qyzmetine qatysty Ádep normalarymen janaspaityn pikir bildirgen.
«Qyzmettik tergeý barysynda E.Qiiasovtyń Almaty qalasynyń Bas memlekettik sanitarlyq dárigerin taǵaiyndaý týraly buiryq shyǵarǵany S.Baiǵabylovpen ádepke jat sózderdiń aitylýyna sebep bolǵandyǵy anyqtaldy.
Osylaisha, S.Baiǵabulov tarapynan Ádep kodeksiniń 11-tarmaǵynyń, 12-tarmaǵynyń 3) tarmaqshasynyń talaptary saqtalmaǵan, sebebi, memlekettik qyzmetshiler BAQ-ta qate nysanda pikir talastyryp, memlekettiń laýazymdy tulǵalarynyń atyna ádepke sai emes pikir bildirgen.
Ádep jónindegi keńes músheleriniń sheshimi negizinde S.N.Baiǵabulovty «eskertý» túrinde tártiptik jaýapkershilikke tartý usynyldy», - delingen habarlamada.
Aita keteiik, Erlan Ańsaǵanuly Qiiasov ózi bergen ótinishke sáikes Qazaqstan Respýblikasy Úkimetiniń qaýlysymen QR Densaýlyq saqtaý vitse-ministri — QR Bas memlekettik sanitarlyq dárigeri qyzmetinen bosatylǵan bolatyn.
