5 qarashada Almatyda BAURZHAN foundation qory uiymdastyrǵan KITAP FEST kitap festivali ótti. Qazaqstannyń jalǵyz kitap festivali bolyp tabylatyn aýqymdy shara Almaty qalasy ákimdiginiń qoldaýymen 2013 jyldan beri jyl saiyn ótkizilip keledi.
Biylǵy KITAP FEST balalar jylyna sáikes keldi. Memleket basshysy Qasym-Jomart Toqaev atap ótkendei, «Balalarǵa erekshe kóńil bólý kerek. Olardyń ál-aýqaty - memleketimizdiń tabysty bolashaǵynyń senimdi kepili». Qazaqstandaǵy balalar jylyna arnalǵan jobanyń basty maqsaty da - oqyrman mádenietin damytyp, jazýshylar men olardyń oqyrmandary úshin biryńǵai alań quryp, balalar men jastar arasynda kitapqa degen qyzyǵýshylyqty arttyrý.
«8 jyl ishinde Kitap Fest Almatynyń kitap súier qaýymy úshin ǵana emes, barlyq qazaqstandyqtar úshin súiikti alańǵa ainaldy. 2019 jyly biz festivaldi elordada ótkizdik jáne jyl saiyn múmkindikter shekarasyn keńeitip, úzdiksiz damýǵa umtylamyz. Jaqyn arada kitap festivalin elimizdiń basqa qalalary men óńirlerinde de ótkizýdi josparlap otyrmyz, óitkeni oǵan úlken qyzyǵýshylyq pen suranys bar», - dedi Kitap FEST kitap festivaliniń bas úilestirýshisi Maira Áljanova.
10 saǵattyq Kitap FEST festivaliniń mádeni baǵdarlamasynda - festival qonaqtary ákelingen kitaptarmen ózara almasýǵa, unaǵan kitaptardy jeńildikpen satyp alýǵa nemese olardy tolyǵymen tegin alýǵa múmkindik aldy. Biylǵy kitap festivalinde ár túrli janrdaǵy 3000-nan asa kitap tegin taratyldy.
Festivalde 30-ǵa jýyq jazýshylar olardyń ishinde: Aqberen Elgezek, Gúljan Amangeldiqyzy, Doshan Jylqybai, Maqsat Málik jáne basqa da kóptegen avtorlar ózderiniń jańa kitaptaryn tanystyrdy. Qalamgerler qazirgi ádebiettegi ózgerip jatqan tendentsiia týraly óz oilarymen bólisti. «Oflain kitaptar týraly» shatyrda tanymal balalar jazýshylary jáne blogerler qaýymy óz tájiribelerimen bólisti. Kitap jármeńkesinde kitap dúkenderi, baspagerler jáne internet-dúkenderi óz ónimderin kórmede 20%-ǵa deiingi jeńildikpen satty. Balalarǵa arnalǵan oiyn-saýyq baǵdarlamasy aiasynda animatorlar, teatr qoiylymdary, sheberlik synyptary, akvagrim men túrli qyzyqty baiqaýlar kelgen qonaqtarǵa tamasha kóńil-kúi syilady.
Sondai-aq, festivalde alǵash ret «Aýylǵa kitap» aktsiiasy ótti, nátijesinde 600-ge tarta kitap jinaldy. Aldaǵy ýaqytta olar Qazaqstannyń aýyldyq kitaphanalaryna tapsyrylady.
Belgili qazaqstandyq jazýshy «18:47» kitabynyń avtory, «Altyn tobylǵy» baiqaýynyń jeńimpazy Doshan Jylqybai jylsaiyn atalysh kitap festivali shyǵarmashylyq kezdesýler úshin bedeldi jáne qýatty alańǵa ainalǵanyn atap ótti.
«Bundai sharalardyń uiymdastyrylyp turǵany óte jaqsy. Ádette, jazýshylar óz aýditoriiasymen tek kitaphanalarda nemese basqa da kishigirim jiyndarda kezdesip jatady. Al osyndai kitap festivalinde kez-kelgen kitapqa qyzyǵatyn adam óz súiikti jazýshylarymen tikelei júzdesip, pikir almasyp kitabyn alýǵa múmkindigi bar. Sondyqtan mundai sharalar avtorlardyń aýditoriiasyn keńeitedi dep oilaimyn» - dedi jazýshy.
Festivalde «Mama, qazaqsha sóileshi» orys-qazaq sózdiginiń jáne qazaq tilindegi balalardy damytý kitaptarynyń avtory Ásel Sapaqova balanyń jeke basynyń damýyndaǵy ádebiettiń róli týraly aityp berdi.
«Uiymdastyrýshylarǵa osyndai keremet is-shara úshin alǵys aitqym keledi.Biyl festivalde halyq sany kóp boldy,bizdiń maqsatty aýditoriiamyzdyń kóp bóligi keldi desek te bolady. Barlyq kitaptar derlik satyldy. Osyndai sharalardyń órkendeýin jáne kitapsúier qaýymnyń qatary artsyn dep tileimin», - dep atap ótti jazýshy.
Kitap FEST festivali Almatyda 8 jyl qatarynan ótkizilip keledi. 2019 jyly ol alǵash ret bas qala Astana qalasynda ótti. Uiymdastyrýshylar festivaldi Qazaqstannyń barlyq iri qalalarynda ótkizýdi josparlap otyr.
Aita keteiik, Kitap fest kitap festivali - 2014 jyldan beri jyl saiyn ótkizilip kele jatqan mádeni-buqaralyq is-shara. 8 jyl ishinde ol shyǵarmashylyq kezdesýlerdiń negizgi alańyna ainaldy, onda avtorlar men baspalardyń qatysýymen 200-ge jýyq kitap usynyldy, jármeńkelerge 150-ge jýyq kitap dúkeni qatysty. Jyl saiyn kitap festival barysynda 3000 myń kitap tegin taratylady.
Kórkem ádebiet janrlary boiynsha 2021 jyly Qazaqstanda qazaq ádebieti boiynsha 814 kitap shyǵaryldy, onyń ishinde balalarǵa arnalǵan ádebiet -27, balalarǵa arnalǵan ádebiet (proza)-77, balalarǵa arnalǵan basqa da ádebiet túrleri-3. QR Kitap palatasyna ózderiniń kitap ónimderin respýblikanyń 266 baspasy men baspa uiymdary tapsyrdy. Ótken jyldarmen salystyrǵanda kitaptardyń sany 437-ge (+8,3% - ǵa) ósti, al basylymdardyń taralymy 953 danaǵa artqan. Dástúr boiynsha baspalar men baspa uiymdarynyń aýmaqtyq ornalasýy boiynsha Almaty qalasy 152 (54,2%) men Astana qalasynda 30 (10,7%) kósh bastap tur.
