Qalanyń qoǵamdyq densaýlyq saqtaý basqarmasy 21 maýsym kúni koronavirýstan qaitys bolǵan eki adam týraly aityp berdi, dep habarlaidy "Ult aqparat".
«1960 jyly týǵan er adam 5 maýsymda infektsiialyq statsionarǵa jatqyzyldy. Aýrýhanaǵa túskende eki jaqty polisegmentarly pnevmoniia bolǵandyqtan jaǵdaiy aýyr bolatyn. Birden ókpeni jasandy jeldetý apparatyna qosyldy. Diagnostika jáne emdeý hattamasyna sáikes emdeldi. Soǵan qaramastan júregi toqtap qaldy. Dárigerler oǵan 30 minýt boiy reanimatsiialyq sharalar jasady, ókinishke qarai qaitys boldy», - dep habarlady qoǵamdyq densaýlyq saqtaý basqarmasy.
Kóz jumǵan ekinshi adam 63 jasta bolǵan. Maýsymnyń basynda JRVI belgilerimen aýyrǵan. Úide ózdiginen emdelgen. 14 maýsymda jedel járdem kóligimen infektsiialyq statsionarǵa jetkizilip birden jatqyzyldy.
«Sol kezde koronavirýs infektsiiasynyń taldaýy oń nátije kórsetken. Basqa da syrqaty bolǵan. Birneshe jyldan beri sozylmaly júrektiń ishemiialyq aýrýy, arterialdy gipertenziiamen aýyrǵan. Viremiia belsendi bolǵandyqtan , aýyr mýltimorbid saldary poliaǵzalyq sindromyna ákep soqty jáne sodan qaitys boldy», - dep qosty vedomstvodaǵylar.
Komissiia eki adamda SARS-COV-2 saldarynan ekijaqty pnevmoniia bolyp, qaitys boldy degen sheshim shyǵardy.
Almatyda jalpy koronavirýstan qaitys bolǵandar sany 20-ǵa jetti.
