Qańtar aiyndaǵy oqiǵalar barysynda Almaly aýdanyna eń kóp zaqym kelgen. Bul týraly Almatynyń tynys-tirshiligin qalpyna keltirý jónindegi qalalyq shtab otyrysynda qala ákimniń orynbasary Iliias Óserov aitty, dep habarlaidy QazAqparat.
«Almaly aýdanynda 7 azyq-túlik dúkeni, 284 azyq-túlik emes dúkeni, 2 qarý-jaraq dúkeni, 15 qoǵamdyq tamaqtaný nysany, 35 lombard, 5 janar-jaǵar mai quiý stantsiiasy, 25 qarjy uiymy, 29 iri biznes nysany jáne t.b. zaqymdanǵan. Aýdannyń jalpy shyǵyny 20,4 mlrd teńgeni qurady», - dedi qala ákiminiń orynbasary.
Sonymen qatar, Áýezov jáne Bostandyq aýdandarynyń da shyǵyny úlken.
Mysaly, Áýezov aýdanynda 153 dúken, onyń ishinde 1 qarý-jaraq, 9 qoǵamdyq tamaqtaný orny, 21 JQS, 11 lombard jáne 10 iri biznes nysany qirady. Jalpy shyǵyn 20,1 mlrd teńgege baǵalandy.
Al Bostandyq aýdanyndaǵy nysandar 17,3 mlrd teńgege shyǵynǵa ushyrady.
Iliias Óserovtyń aitýynsha, eń az shyǵyn - Naýryzbai aýdanynda. Onda shyǵyn kólemi 72,5 mln teńgeni kórsetti.
Qala ákiminiń orynbasary zardap shekken nysandar boiynsha derek jinaý jumysy jalǵasyp jatqanyn atap ótti.
«Belgili bolǵandai, qazirgi ýaqytta Úkimet zalaldy baǵalaý jáne óteý tetigin ázirlep jatyr. Bul qujatta óteý somasyn anyqtaý ádistemesi, komissiialar men baǵalaýshylardyń jumys tártibi, sondai-aq, basqa da rásimder reglamentteledi», - dedi Iliias Óserov.
Aita keteiik, ótinimdi infokazakhstan.kz saitynda berýge bolady (ákimshisi «Atameken» UKP, sait tehnikalyq daiyn).
Ótinimge kásipkerler tetikte kórsetiletin qujattar paketin, onyń ishinde zalal faktisi boiynsha qylmystyq is qozǵaý týraly habarlamany qosa berýi kerek.
Esep zalaldyń 3 sanaty boiynsha júrgiziledi: jyljymaityn múlik, jyljymaly múlik jáne jabdyqtar, taýarlar.
Budan ári ótinimderdi aýdandyq komissiia qaraidy.
Onyń quramyna máslihat, ákimdik, kásipkerler palatasy jáne qoǵamdyq birlestikter ókilderin qosý josparlanǵan.
Budan ári búkil rastaityn qujattar men baǵalaý nátijesiniń negizinde komissiia zalaldy óteý týraly sheshim qabyldaidy.
