Polisia.kz
Ishki ister ministrligi uiymdasqan qylmystyq toptardyń ustalǵanyn aitty, - dep habarlaidy «Ult aqparat» Polisia.kz -ke silteme jasap.
Olardyń kriminaldyq qyzmeti týraly dáleldemelerdi jinaý arqyly qylmystyq toptardyń jetekshileri men belsendi múshelerin qoǵamnan oqshaýlaý jóninde keshendi sharalar qabyldanyp jatyr. Jyl basynan beri uiymdasqan qylmystyq top qurý, oǵan basshylyq etý jáne qatysý boiynsha 15 derek anyqtalyp tirkeldi. Ártúrli qylmystar jasaǵany úshin qylmystyq toptardyń 30-dan astam jetekshileri men belsendi músheleri ustaldy.
7 aqpanda IIM men UQK qyzmetkerleri Almatyda quramynda belgili "Aishýaq-Jantúgel" uiymdasqan qylmystyq tobynyń músheleri bar topty quryqtady. Jedel-tergeý is-sharalarynyń nátijesinde 14 adam ustaldy. 7 atys jáne travmatikalyq qarý, 4 granata, 200-den astam oq-dári, esirtki zaty, sondai-aq, basqa da sýyq qarý tárkilendi. Top músheleri kásipkerlerge ózderiniń kriminaldyq "qamqorlyǵyn" kórsete otyryp, olardy bopsalaýmen ainalysqany anyqtaldy. Olar Almatynyń temir jol vokzaldary aýmaǵynda, sondai-aq, bazarlarynda óz yqpalyn júrgizgen.
"Ustalǵan adamdarǵa qatysty Almaty qalasy PD tergeý basqarmasy bopsalaý jáne bas bostandyǵynan zańsyz aiyrý derekteri boiynsha birneshe qylmystyq isti tergeýdi bastady, - dedi QR IIM uiymdasqan qylmysqa qarsy kúres departamentiniń basqarma bastyǵy Qýandyq Alpys.
Sol kúni politsiia kúshimen Stepnogorsk qalasynda osyǵan uqsas ustaý júrgizildi. Jedel jumystyń nátijesinde qorqytý jáne kúsh kórsetý arqyly qalanyń turǵyndaryn bopsalaýmen ainalysqan jergilikti kriminalitettiń qatarynan turatyn toptyń joly kesildi.
"Qylmystyq toptyń barlyq músheleri ustalyp, ýaqytsha ustaý izoliatoryna qamaldy. Olarǵa qatysty Aqmola oblysy PD tergeý basqarmasy bopsalaý derekteri boiynsha 6 qylmystyq isti tergep jatyr. Kórsetilgen derekter boiynsha ózge málimetter tergeý múddesinde jariialanbaidy", - dedi Qýandyq Alpys.
