Almatyda «Anna» qarý-jaraq dúkenin tonaýǵa qatysqan taǵy bir adam ustaldy. Bul - buryn bótenniń múlkin urlaǵany úshin sottalǵan 33 jastaǵy Jambyl oblysynyń turǵyny, dep habarlaidy QazAqparat.
5 qańtarda Almatyda S. esimdi azamat qarý-jaraq dúkenin tonaýǵa qatysqan.
Atap aitqanda, dúkenniń esikterine ornatylǵan tordy syndyrý úshin tros bailanǵan VAZ-2114 avtokóligin júrgizgen.
Osy zańsyz áreketiniń nátijesinde kúdikti eki tegis uńǵyly jáne eki myltyqty alyp ketken.
«Qazirgi ýaqytta onyń jappai tártipsizdik pen qarýly shabýyldarǵa qatysy bar-joǵy tekserilip jatyr. Esterińizge sala keteiin, sol kúni qalada bir mezgilde jeti qarý-jaraq dúkenine shabýyl jasaldy, qylmyskerler 1 347 qarýdy, onyń ishinde 501 myltyq, 807 tegis uńǵyly jáne 39 gaz-travmatikalyq qarýdy áketken, sondai-aq oq-dári tonaldy», – deidi Almaty qalalyq politsiia departamenti bastyǵynyń orynbasary Berik Ábilbekov.
Urlanǵan qarý kúdiktiniń úiinen tárkilendi. Aitý kerek, ol buǵan deiin de bireýdiń múlkin urlaǵany úshin sotty bolǵan.
«Besi kúni úiden shyqtym. Bes beitanys adam kóligimdi toqtatyp, «júr, aǵa, kettik. Biz saǵan jol kórsetemiz» dep kólikke minip aldy. Biz qarý-jaraq satatyn dúkenge kelgen ekenbiz. Olar meniń kóligime tros bailady jáne tartýdy buiyrdy. Terezeleri, esikteri synǵan. Bul belgisiz bireýler kólik ishine eki avtomatty ákeldi, júk salǵyshqa eki myltyqty laqtyrdy. Sosyn men osy qarýmen ketip qaldym», – dedi kúdikti.
Kúdikti qamaýǵa alyndy.
