Almatyda qart adamdy uryp-soǵyp, ony videoǵa túsirip alǵan jasóspirimder qylmystyq jazaǵa tartylmady, dep habarlaidy "Ult aqparat" qalalyq sottyń baspasóz qyzmetine silteme jasap.
Almaty qalasy kámeletke tolmaǵandardyń isteri jónindegi mamandandyrylǵan aýdanaralyq sotynda aldyn ala sóz bailasý arqyly adamdar toby jasaǵan buzaqylyq deregi (Qylmystyq kodekstiń 293-baby 2-bóliginiń 1-tarmaǵy) boiynsha kámeletke tolmaǵan sottalýshylar - J. jáne J.-ǵa qatysty qylmystyq is qaraldy.
"Sot kámeletke tolmaǵandar shildede qalanyń ortalyq kósheleriniń mańynda júrip, mas kúide jatqan azamat Sh.-ny baiqap, aiaǵynan sál iterip, oiata bastaǵanyn anyqtady. Buǵan jaýap retinde azamat Sh. kámeletke tolmaǵandarǵa balaǵat sózder aitqan, sodan keiin jasóspirimder Sh.-dan alystai bastaǵan.
Óz kezeginde, kámeletke tolmaǵandardyń biri qorlanyp, estigenine tóze almai, óziniń artyqshylyǵyn kórsetkisi kelip, jábirlenýshiniń betinen birneshe ret urǵan. Ekinshi sottalýshy oqiǵanyń bárin smartfonynyń beinekamerasyna túsirip, jábirlenýshige dene jaraqatyn salýǵa baǵyttalǵan belsendi is-áreketterdi jasaýǵa itermeleidi jáne mysqyldap, uiatsyz túsiniktemelermen súiemeldep, arandatýshy rólin atqarǵan.
Osydan keiin, olar qoǵamǵa ózderin tanytqysy kelip, túsirgen beinerolikti kórsetý úshin erkin qoljetimdi "Instagram" áleýmettik jelisinde taratqan" - delingen habarlamada.
Sarapshynyń qorytyndysy boiynsha jábirlenýshi Sh.-nyń densaýlyǵyna jeńil ziian keltirilgen.
"Sotta aiypkerler óz kinálaryn tolyq moiyndap, istegen isterine ókinip, jábirlenýshiden keshirim surady. Kámeletke tolmaǵandardyń ata-analary jábirlenýshige keltirilgen materialdyq jáne moraldyq zalaldy ótedi.
Jábirlenýshi sotta aiypkerlermen tatýlasqanyn, qandai da bir shaǵymdary joq ekenin, osyǵan bailanysty olardy qylmystyq jaýapkershilikten bosatýdy suraitynyn málimdedi.
Olardyń zańdy ókilderi azamat Sh.-ǵa materialdyq jáne moraldyq zalaldy óteýi sebepti jasóspirimderdi keshirdi", - delingen habarlamada.
Osyǵan bailanysty sot 68-babynyń 1-bóligi negizinde kámeletke tolmaǵan sottalýshylardy qylmystyq jaýapkershilikten bosatty, osy is boiynsha is júrgizýdi toqtatty.
