Almatyda shtabtyń erekshe ókimine deiin saqtalatyn karantin kezinde balabaqshalar qalai jumys isteitini jaily qalanyń bas memlekettik sanitarlyq dárigeri Jandarbek Bekshin onlain brifing barysynda aitty, dep habarlaidy QazAqparat.
«Balalardy balabaqshalarǵa qalai aparýǵa bolady degen suraq kópshilikti alańdatyp otyr. Ár balabaqshada 50 paiyz ǵana bala toptalǵan jaǵdaida toptardy ashýǵa ruqsat beriledi. Sonda búkil balabaqshada aýrý taralý múmkindigi tómendeidi. Taǵy da balabaqshalarǵa dezinfektsiialyq sanitarlyq talaptardy kúsheitip jatyrmyz. Ár balabaqsha 15 minýt-1 saǵat ishinde jeldetilýi tiis. Oiynshyqtardy, esik tutqalaryn 2 ret óńdeý talap etiledi. Balalarǵa jumsaq oiynshyqtardy berýge tyiym salynady. Balalardyń jatyn oryndarynda ár tósektiń arasy 1 metr bolý kerek», - dedi Jandarbek Bekshin.
Onyń aitýynsha, tárbieshiler men qyzmetkerlerge de mindetti túrde qolǵap pen maska taǵý talap etiledi.
Balalardy balabaqshaǵa júkti áielder men qart adamdarǵa ákelýge ruqsat berilmeidi. Óitkeni, juqtyrý qaýpi joǵary.
Ár aýdanda osy talaptardy qadaǵalaý úshin arnaiy toptar qurylady.
«Bul úshin ár aýdandarda balabaqshalardy qabyldaýshy arnaiy toptar qurylady. Olarǵa bilim bóliminiń qyzmetkerleri, aýdandyq sanitarlyq mekeme qyzmetkerleri kiredi. Olar birlesip barlyq baqshalardy qarap shyǵady. Tekserý barysynda zań buzýshylyqtar tirkelse olar ákimshilik jaýapkershilikke tartylady. Tipti balabaqsha jabylady», - dedi J.Bekshin.
Sonymen qatar, bas sanitarlyq dáriger barlyq balabaqshalarǵa bakteritsidti lampa, aýa tazalaityn retserkýliator ornatýǵa keńes berildi.
