© AP / Vasily Krestyaninov
Almatyda búlingen jol infraqurylymyn qalpyna keltirý jumystary júrgizilip jatyr. Bul týraly qalalyq mobildilik basqarmasynyń basshysy Ǵani Myrzahanov aityp berdi, dep habarlaidy QazAqparat.
«Qalanyń kóshe-jol jelisin baqylaý barysynda 1 050 sharshy metr jol jabynynyń buzylǵany, 410 metr jiektar qulatylǵany, 98 metall tor buzylǵany anyqtaldy. Jóndeý-qalpyna keltirý jumystary aiaqtaldy. Jaiaý júrginshi joldarynyń 2025 sharshy metr kespekshesi alynǵan. Qazir jaiaý jol jabyny qalpyna keltirildi», - dedi basqarma basshysy.
Onyń aitýynsha, Almatyda 46 baǵdarsham men 121 jol belgisi zaqymdalǵan. Búginde olar tolyǵymen qalpyna keltirildi.
Sonymen qatar, avtobýs pavilondaryn qalpyna keltirilip jatyr. 43 avtobýs pavilony búlingen, onyń 23-i tolyq qalpyna keltirildi. Qalǵan 20 pavilondy qańtar aiynyń sońyna deiin jóndeý josparlanyp otyr. Bul jumystar jeke investorlardyń qarajaty esebinen júrgiziledi.
«Sondai-aq, «AlmatyBaik»-tyń 220 velosipedi men 21 velobeketi buzylǵan. 170 velosiped urlanǵan. Qazirgi ýaqytta IT-júiesin qalpyna keltirý jáne tekserý jumystary júrgizilýde. Halyqqa arnalǵan servisti jańartý 20 qańtarǵa deiin josparlanǵan», - dedi Ǵani Myrzahanov.
Ol zaqymdalǵan velosipedterdi jóndeý jáne urlanǵan velosipedterdi qalpyna keltirý úshin qosymsha qarajat bólý máselesi pysyqtalyp jatqanyn atap ótti.
Aqyly avtoturaqtardyń qyzmeti tótenshe jaǵdai rejimi aiaqtalǵanǵa deiin toqtatylǵan.
Budan bólek, qalada 24 parkomat búlingen. Búgingi kúni atalǵan parkomattardy jóndelip jatyr. Jóndeý-qalpyna keltirý jumystaryn qańtar aiynyń sońyna deiin aiaqtaý josparlanǵan.
Qalalyq mobildilik basqarmasynyń basshysy sondai-aq jol aiyryqtarynda, ótpelerde jáne metroda qurylys-montajdaý jumystary qaita bastalǵanyn habarlady.
