Almatyda tolassyz jaýǵan qarly jańbyrdyń saldarynan aǵashtar qulady, dep habarlaidy "Ult aqparat".
Abai men S.Seifýllin kósheleriniń qiylysynda ornalasqan meteostantsiianyń habarlaýynsha, qalada 16 mm jaýyn-shashyn túsken, qar jamylǵysynyń biiktigi 7 sm-ge jetti. Túnde jáne tańerteń joldarda kóktaiǵaq boldy.
Sekýndyna 2 metr jel soǵyp, aýa temperatýrasy Tselsii kórsetkishi boiynsha 0,2 gradýs boldy.
Qalalyq TJD-nyń kezekshi nómirine butaqtar men aǵashtar qulaǵany týraly 8 qońyraý túsken. Almaty qalasy Qutqarý qyzmetiniń jedel kezekshisiniń aqparaty boiynsha, úsh jerde qulaǵan aǵash 4 avtokólikti basyp qalǵan. Tótenshe jaǵdaidyń saldaryn joiýǵa Almaty qalasy Qutqarý qyzmetinen 5 arnaiy tehnika men 17 adam jumyldyryldy. Oqys oqiǵadan adamdar japa shekken joq.
