Óńirlik kommýnikatsiialar qyzmetiniń alańynda qalanyń bas sáýletshisi Almas Janbyrshy osylai dep málimdedi.
Onyń aitýynsha, Almatynyń Bas josparyna túzetý engizý – qalanyń ósý qarqyny men jańa syn-qaterlerdi kórsetetin strategiialyq mańyzdy qadam.
«Memleket Basshysynyń Bas josparǵa jedel ózgeris engizý týraly tapsyrmasy boiynsha biz qorshaǵan ortany qorǵaýdy kúsheitip, qalalyq ortany damytyp, aimaqtardy qaita bólý arqyly taý bókterin retsiz qurylystan qorǵaýdy kózdeitin biraz jumys bitirdik», - dedi sáýletshi.
Jańartylǵan Bas jospar jobasy boiynsha qoǵamdyq tyńdaý biylǵy jyldyń 24–26 jeltoqsan kúni ótpek. Ótetin ýaqyty men ornyn qala turǵyndaryna aldyn ala habarlap aitady.
«Ár almatylyq óz aýdanynyń qalai damitynyn bilýi úshin jobamen tanysa alady: qai jerde mektep, jol, emhana, saiabaq salynatynyn, sondai-aq salynýy múmkin qurylys jóninde aldyn ala bile alady. Bul turǵyndarǵa baspanaǵa qatysty sheshimder qabyldaýǵa kómektesedi. Ár adam pikir bildire de alady, ony mindetti túrde eskeremiz», — dep atap ótti Almas Janbyrshy.
