Almatyda Muhtar Áýezov atyndaǵy Qazaq memlekettik drama teatrynda «Fariza» spektakliniń premerasy ótti, dep habarlaidy "Ult aqparat" «Habar 24» telearnasyna silteme jasap.
Poeziia padishasy Fariza Ońǵarsynovaǵa arnalǵan qoiylym zamanaýi tehnikanyń kómegimen sahnalandy. Syrshyl da shynshyl aqynyn saǵynǵan jurt qoiylymnan úlken ásermen shyqty.
Ideia avtory Ainur Kópbasarovanyń aitýynsha, jyr áleminde ózindik qoltańbasymen erekshelengen aqyndy sahnalaý týraly oi úsh jyl buryn týǵan.
«Fariza Ońǵarsynova qanshalyqty jumbaq adam bolsa, bul qoiylymnyń ózi sonshalyqty mistikaǵa toly. Óitkeni Farizanyń jumbaq dúniesin ashý - bir tylsym kúsh. Ol óz ishki dramasyn tragediiasyn poeziiaǵa, poeziiasyn filosofiiaǵa ainaldyrǵan dara aqyn», - deidi ol.
Qoiylymda zamanaýi tehnologiia qoldanylǵan. Aitylar oi men sózge sai sahnalyq bezendirý jáne kompozitor Renat Gaisin jazǵan mýzyka kópshilik kóńilin dóp basqandai. Prodiýserlik ortalyqtyń tapsyrysymen pesany dramatýrg Roza Muqanova jazyp shyqqan. Al basty keiipker - Fariza rólin Áýezov teatrynyń aktrisasy Nazgúl Qarabalina oinady.
Qoiylymnyń rejisseri Farhat Moldaǵaliev atap ótkendei, akterlar keiipkerlerdiń portrettik beinesin emes, ishki jan dúniesin ashýǵa tyrysqan.
«Spektakldiń eń birinshi ereksheligi, bul Qazaqstanda bolmaǵan jaǵdai - bes teatrdyń basyn qurap otyrǵan spektakl. Bul jerde jańa tehnologiialardy qoldandyq, jańa, basqasha dybys shyǵaratyn tehnikalyq jaǵynan da óte jaqsy jabdyqtalǵan spektakl», - deidi Farhat Moldaǵaliev.
Spektakl alǵashqy qoiylymynan-aq kórermenniń kóńilinen shyqty. «Fariza» endi qazan aiynda Máskeýde sahnalanady.
